Shillong, Nailur 22
U Myntri ka tnat ïalehkai ka Sorkar Pdeng u Anurag Thakur u la sangeh ka jingleit sha China na ka bynta ka jingplie ïa ka lympung ïalehkai 19th Asian Games ka ban long ha Hangzhou hadien ba ki bor ba dei khmih ka China ki la kyntait ban ai jingbit ïa lai ngut ki nongïalehkai kiba na Arunachal Pradesh kiba la thmu ban ïashim bynta ha kane ka lympung ka ban sdang naduh ka sngi Saitjaiñ.
U Wei Jizhong, chairman ka ethics panel jong ka Olympic Council of Asia (OCA) na ka bynta ka Asian Games u la ong ba ïa kitei ki nongïalehkai kiba na India la ai jingbit ba kin rung sha China bad ka Beijing kam dei ban kyntait ïa kano kano ka visa.
Kitei lai ngut ki ‘thei ïalehkai wushu na India kim shym la lah ban ïasoh lang bad ka kynhun ïalehkai jong ka ri ha Hangzhou na ka bynta ka Asian Games na ka daw ka jingeh ba ki la ïakynduh ha kaba ïadei bad ka visa. Kine ki nongïalehkai kim shym la ïohpdiang ïa ka jingmynjur na ki bor ba dei khmih jong ka China ban rung sha katei ka ri.
“Kine ki ‘thei ïalehkai na India ki la dep ïoh ïa ka visa ban rung sha China. Ka China kam lah ban kyntait ïa kano kano ka visa. Hynrei kaba sngewsih ka long ba ïa ka visa jong kitei ki nongïalehkai la shah kyntait noh. Ngam tharai ba kane kan buh jingeh ïa ka OCA namar ka China ka dep ban mynjur na ka bynta ban shah ïa baroh ki nongïalehkai ki ban ïashim bynta ha China,” la ong u Wei.
Na ka liang u President ba shi por jong ka OCA u Randhir Singh u la ong, “Ngi la shong jingïalang ha ka sngi Palei bad ka Working Group ha kaba la shim khia halor kane ka bynta ban ïakren bad ka Sorkar.”
