Shillong, Nailur 22
Ka lympung ïalehkai U-20 4th Division Football League 2023 ba la pynïaid da ka Shillong Sports Association ka la jam shaphrang ha kaba ka Riatsamthiah SC, Risa Colony SC bad ka Mawkriah West SC ki la khur ïa ka jingjop ha ka sngi Thohdieng ha madan Polo.
Ha kane ka jingïakhun kaba la long ha madan Third Ground, ka Riatsam-thiah ka la pynliem noh ïa ka Pynthorbah SC da 3-0 kol. U Dingbarous Nongsiej u la thep ar kol ha ka mint kaba 16 & 41, katba ïa kawei pat la pynbud da u Jerry Donboklang Kharkongor ha ka minit kaba 45.
Ka Laitkroh SC ka la ïasam mar shi point ha ka jingïakhun pyrshah ïa ka Mawñianglah Youth SC hadien ba kim shym la lah ban thep kol haduh kaba kut ka jingïalehkai.
Ka Diengpasoh SC ka la shah rem noh ha ka Risa Colony SC da 2-1 kol. Tang mar ïasdang ka jingïalehkai ka Risa Colony ka la ïoh ban pynkhih jar nyng-kong eh lyngba u Nonistar Swer ha ka minit kaba 4. Hynrei ha ka minit kaba 24 ka Diengpasoh ka la lah ban pynïakhaid kylla lyngba u Apbhalang Marboh.
Hadien shiteng kynta ka Risa Colony ka la pynbud biang ïa ka kol kaba ar lyng-ba u Riklansing Warmalai ha ka minit kaba 35 na ka bynta ban khur syndon ïa ka jingjop.
Ka Madan S&CC ka la ïasam mar shi point ha ka jingïakhun pyrshah ïa ka Umrynjah SC hadien ba kim shym la lah ban thep kol haduh kaba kut ka jingïalehkai.
Ka Mawkriah West SC ka la lah ban pynliem noh ïa ka Pommura SC da 2-1 kol. Ha kane ka jingïakhun ka Mawkriah West ka la ïoh ban thep kol nyngkong eh lyngba u Leverence Jeremy Nongbri ha ka minit kaba 26 bad ka la pynbud biang ïa ka kol kaba ar ha ka minit kaba 37 lyngba u Waricky Shabong.
Ka Pommura ka la lah ban pynphai kylla shi kol ha ka kylla miet lyngba u Apporlang Mawthoh ha ka minit kaba 60 hashwa ba kan mad ïa ka jingshah rem.
