Shillong, Nailur 22
Ar ngut ki nongmareh ba paw na Kenya ki la wan poi ha kane ka nongbah ha ka sngi Thohdieng na ka bynta ban pynkhreh ïashim bynta ha ka 2nd Sohra International Half Marathon.
Ïa kane ka jingïakop mareh yn pynlong ha ka 30 tarik mynta u bnai da ka Meghalaya State Olympic Association (MSOA) ha ryngkat ka jingïatrei lang bad ka tnad ïalehkai ka Sorkar Jylla.
Kane ka jingïakop mareh kan sdang naduh Laitsohpliah sha Sohra haduh Mawsmai ka ban kynthup naduh ka Elite 21k, Meghalayan 10k, Run For Fun 5k bad ka Vateran Above 55 yrs.
Kitei ki ar ngut ki nongmareh kiba na Kenya ki long u Elijah Kipruto Kemei 35 snem ka rta bad ka Agnes Mueni Mutua 36 snem ka rta.
U Elijah u dei uba la bat ïa ka rekod da kaba pyndep ha ka 1 kynta 5 minit. Une u nongmareh u dei uba la ïashim bynta ha kiba bun ki jingïakop mareh kiba kynthup ïa ka Mumbai Marathon ha u 2018, ha China ha u 2019, 1st Sohra International Half Marathon ha u 2022, ha Udaipur bad ha Guja-rat mynta u snem. Katba ka Agnes ka dei kaba la bat ïa ka rekod ha ka 21k ha ka 1 kynta 14 minit. Ha u snem ba la lah ka la ïashim bynta ha Tanzania ha u 2022, ha Rwanda ha u 2023 bad kan dei ka sien kaba nyngkong eh ban wan ïashim bynta hapoh ri India kynthup ïa ka Sohra International Half Marathon.
Kitei ki ar ngut ki nongmareh ki la wan ai jingtip ïa lade hapoh ka shlem treikam jong ka Meghalaya State Olym-pic Association (MSOA) ha ka sngi Thohdieng ban ïakynduh ïa ki nongïalam kane ka synjuk kata u Bah Finely L. Pariat, Organi-sing Secretary bad u Bah John F. Kharshiing, Co-Chairman jong ka 2nd Sohra International Half Marathon 2023.
