Mairang, Nailur 24
Ka Kynshi Bangla Social & Cultural Sports Club ka la pynkhreh shaid shaid ban pynbit pynbiang ïa ka madan ïalehkai kumjuh ruh ïa ki jaka shong na ka bynta ki nongwan peit kai kum shibynta ban pynkhreh ïa ka lympung ïalehkai phutbol kaba heh ha ka thaiñ ïa kaba la tip kum ka 3rd Knock-out Football Tournament 2023.
Ki nongkitkam ka Kynshi Bangla ki la pyntip ba ïa kane ka lympung ïalehkai yn plie pyrda ha ka 28 tarik u Nailur 2023 ha kaba ki ar tylli ki kynhun ïalehkai ba radbah kin hiar madan ban ïakhun ba kynthup ïa ka Chan Shaphrang Football Club kan ïakhun pyrshah ïa ka Mawshynrap Football Club ha ka por 2.30 janmiet ha madan ka shnong Kynshi Bangla ha Eastern West Khasi Hills.
Shuh shuh ki la pyntip ruh ba ha shuwa katei ka jingïalehkai hapdeng kitei ki ar tylli ki kynhun, ha katei ka sngi sdang lane plie pyrda kin don ruh kiwei pat ki prokram ki ban sdang naduh ka por 1 baje mynsngi bad ha kane ka sngi u Myntri ka tnat ïalehkai ka sorkar Jylla un long u kongsan.
La pyntip ruh ba ha kane ka lympung ïalehkai kin don haduh 16 tylli ki kynhun ïalehkai na kylleng ki jaka jong ka Ri Khasi Jaintia.
Ki nongpynïaid ki la pyntip ruh ba na ka bynta katei ka lympung kaba heh, ka khusnam kan long 4 lak tyngka bad kan don ruh sa kawei pat ka lympung ïalehkai kaba khamrit ha kaba ka khusnam ka long 50 hajar tyngka.
Kumta na ka liang jong ka Kynshi Bangla ka khot bad wer ïa baroh ki riew ieit phutbol jong ka thaiñ bad na kiwei ki jaka ba kin wan ban sakhi ïa katei ka jingïalehkai bad ki la buh ruh ïa ka jingkyrmen ba khlem pep kan long ka jingïalehkai kaba itynnad.
