Shillong, Nailur 24
Ka lympung ïalehkai phutbol ba la pynïaid da ka Tyrsad Area Sports Association (TASA) ha madan Tyrsad, ha ki kyrdan bapher bapher ka la ïaid shaid shaid shakhmat.
Haba phai sha ki jingïalehkai ba la pynlong ha ka sngi Saitjaiñ, kata ha ka First Division, ka jingïakhun hapdeng ka Mawlum Tyrsad Sports Club pyrshah ïa ka Rangshangkham Sports Club ka la kut noh hapdeng ka jingïakhaid ka bym shym la don satia kiba lah ban pynkhih jar wat haduh ba kut jong ka jingïalehkai.
Ka jingïakhun ka la long kaba ïakhaid bha, ha kaba baroh ar liang mamla ki la ïakhun tyngeh hynrei watla ki la ïoh katto katne ki kabu, ym shym la lah satia ban pynkhih jar bad ha kaba kut ban shu hun noh ka ïasam mar shi point.
Haba phai sha ka jingïalehkai jong ka kyrdan Second Division, ka Phanniewlah Rum Sports Club ka la pynliem noh ïa ka Pompyrthat Sports Club da 5-0 kol bad ïa kine ki kol jong ka Phaniewlah Rum la ïoh ban khyrwit da u Kevinson Jala ha ka minit ba 15 bad 40, u John Anthony Ryntathiang ha ka minit ba 25 bad 36 bad u Macdonal Jala ha ka minit ba 48.
Ha ka jingïalehkai ha ka Third Division pat, ka Laitsohphlang Sports Club ka la lah ban pynliem noh ïa ka Laitlarem Sports Club.
Ki jingïalehkai ban wan jong kane ka lympung, kin bteng biang ha ka 27 tarik mynta u bnai, kata ka Lyngdoh Phanblang Sports Club pyrshah ïa ka Mawpalong Sports Club ha ka por 12 baje, ka Raimulong Sports Club pyrshah ïa ka Phanniewlah Neng Sports Club ha ka por 1.30 mynsngi bad ka Mawponghong Sports Club pyrshah ïa ka Nongspung Sports Club ha ka por 3 baje janmiet.
