Jowai, Nailur 24
U Ernest Marwein marwei u la khyrwit haduh 4 tylli ki kol bad pynlong ïa ka Salaroh Football Club ba kan khur jingjop bad rung syndon sha ka jingïakhun semi-final jong ka lympung ïalehkai (L) Kesilroy Pala Invitation Football Tournament 2023 ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah pynliem kput ïa ka Mynsngat Sports Club da 9-2 kol ha ka jingïakhun quarter final kaba khatduh kaba la long ha madan Kiang Nangbah Stadium Ladthadlaboh, Jowai ha ka sngi Saitjaiñ.
Ïa kine 9 tylli ki kol jong ka Salaroh FC la thep da u Debor Kesaar ha ka minit ba 11, u Arlangki Nongsiej ha ka minit ba 45+1, u Wanlamsuk Nongkhlaw ha ka minit ba 58 & 72, u Ernest Marwein ha ka minit ba 67, 69, 73 & 78 bad u Bishar Kharummuid ha ka minit ba 76.
Katba ïa ki kol jong ka Mynsngat SC pat la thep da u Nidaioh Dhar ha ka minit kaba 35 & 90.
Nalor ka Salaroh FC, kiwei pat ki kynhun kiba la rung sha ka jingïakhun semi-final ki long ka Rymbai Shkenshynriah FC, ka CSA Dienchynrum bad ka United Mukhla FC. Ka jingïakhun semi-final kan long ha ka 29 tarik bad 30 tarik.
