Khliehriat, Nailur 24
Ka Diengshynrum Sports Club ka la long ka lahduh ha ka lympung ïalehkai Under-16 bad 2nd Division katba ka Rymbai Madanpynriang Sports Club ka la ïoh rah ïa ka nam lahduh ha ka lympung ïalehkai 3rd Division Football Tournament ba ka pynïaid da ka East Jaiñtia Hills District Football Association (EJHDFA).
Kane ka nam lahduh jong ka Diengshynrum SC ka la wan urlong hadien ba lah pynliem ïa ka Rymbai Skhenshynriah Sports Club da 1-0 kol ha ka Under-16 bad ha ka 2nd Division pat ka Diengshynrum ka la pynliem noh ïa ka Iatyllilang Sports Club Hingaria da 2-1 kol ha ka jingïakhun final kaba la long ha madan Artificial Turf Diengshynrum, Khliehriat ha ka sngi Saitjaiñ.
Haba phai sha ka jingïalehkai Under-16, ka jingïakhun ka la long kaba ïakhaid hynrei da ka jingïa-lehkai bha ka Diengshynrum SC ka la ïoh ban thep kol ha ka minit kaba 36 lyngba u Bredly Lyngdoh. Kane ka shi kol ka la biang pura ïa ka Diengshynrum ba kan khur ïa ka nam lahduh.
Haba phai sha ka jingïalehkai jong ka 2nd Division, ka Dieng-shynrum SC ka la pynliem noh ïa ka Iatyllilang SC Hingaria da 2-1 kol.
Ha ka jingïakhun, ka Dieng-shynrum SC ka la ïoh ban pynkhih jar nyngkong ha ka minit kaba 3 lyngba Rumi Lyngdoh bad kane ka jingïoh thep kol ka la pynshongshit ïa ki nongkyrshan kiba wan sakhi ïa ka jingïalehkai. Ha ka minit kaba 36 ka Iatyllilang SC Hingaria lyngba u Zidane Lamin ka la ïoh ban pynphai ïa kane ka shi kol.
Haba wan phai ha ka kylla miet, ka Diengshynrum SC ka la ïoh biang ban thep kol ha ka minit kaba 46 kaba dei ruh ka kol kaba ar jong u Rumi Lyngdoh bad da kine ki ar tylli ki kol ka la biang pura ïa ka Diengshynrum ba kan ïoh khur ïa ka nam lahduh.
Ha ka jingïakhun final jong ka lympung ïalehkai 3rd Division, ka Rymbai Madanpynriang Sports Club ka la pynliem noh ïa ka Khliehmyntriang Sports Club da 3-1 kol.
Ha ka jingïakhun, ka Rymbai Madanpynriang SC ka la ïoh ban pynkhih jar nyngkong ha ka minit kaba 13 ba la thep da u Easter Dkhar, ki rangïalehkai ka Khliehmyntriang SC watla ki la shah tam da 1 kol hynrei kim shym la pyndem satia ha kaba kila ïakhun tyngeh na ka bynta ban pynïakhaid ïa ka jingïakhun hynrei kane ka shi kol kala neh haduh ba kut ka kylla step.
Haba wan phai ha ka kylla miet, ki arliang mamla ki la pyrshang tyngeh ryngkat ka kabu ban ïoh pynkhih jar khamtam eh ban ïoh rah ïa ka nam lahduh bad dei ha ka minit kaba 48 ka Khliehmyntriang SC lyngba u Generous Siangshai ka la lah ban pynïakhaid ïa ka jingïakhun bad tang hadien katto katne minit ka Rymbai Madanpynriang SC kala ïoh ban pyntam biang sa shi kol ba la thep da u Sanhame Bareh ha ka minit kaba 52 bad ka kol kaba lai pat la thep da u Rappormi Dkhar ha ka minit kaba 68.
Ki rangïalehkai ka Khliehmyntriang SC ki la ïaleh katba lah ban sei la ki sap ïalehkai bad pyrshang ruh ban pynphai kol hynrei kim shym lah ban pynurlong bad ha kaba kut ka Rymbai Madanpynriang SC ka la ïoh ban khur ïa ka nam lahduh.
Hadien ka jingïalehkai, la sam khusnam sha ki kynhun kiba poi sha ka thong jong ka jingjop bad ki kynhun ba wan ba ar da ka song pisa ryngkat ka trophy.
Ha ka Under-16, ïa ka nam Emerging player la ïoh rah da u Timing Lyngdoh katba ha ka 2nd Division ïa ka nam Emerging player la ïoh rah da u Rumi Lyngdoh kiba na ka kynhun Diengshynrum SC. Ha ka 3rd Division ïa ka nam Emerging player la ïoh rah da u Raplangki Lyngdoh na ka Khliehmyntriang SC.
Ha ka 2nd Division ïa ka nam Best Team la ïoh rah da ka Tongseng Youth SSC bad ha ka 3rd Division ïa ka nam Best Team la ïoh rah da ka TSC Lummyrli.
Ha kane ka sngi la donlang u Bah Kor Sympli uba dei u MDC barim ha ka jingdonlang ki dkhot nongkitkam jong ka EJHDFA.
