Thiruvananthapuram:
U Myntri Rangbah jong ka Kerala u Pinarayi Vijayan lem bad ki dkhot jong ka Kynhun Myntri ki la buh jingthmu ban leit jngoh ïa ki Assembly konstitwensi kiba don ha kylleng ka jylla na ka bynta ban leit ïakynduh ïa ki nongshong shnong bad ban wad jingtip na ki shaphang kiba bun ki kam pynroi bad ki jingmyntoi ba ki ïoh na ka jingpyntreikam jong ka sorkar.
Ki jingïakren bad ki jingïaphylliew jingmut kin sa long bad ki nongmihkhmat kiba na ki jaka bapher bapher katkum ki distrik, bad yn sa pynlong ruh ïa ki jingïalang paidbah, la ong ka jingthoh kaba la wan na ka jaka treikam jong u Myntri Rangbah.
Ka jingïalang jong ki Myntri kaba la long ha ki khyndiat sngi jong ka taïew ba la dep ïa kaba la pynïaid da u Myntri Rangbah u Vijayan ka la dep ban shim ïa ka rai ha kaba ïadei bad kane, ka la ong.
Ka prokram ha kaba ïadei bad ki riewpaidbah kan sa sdang da ka jingïalang kumba la pynbeit mynta ha Manjeshwaram konstitwensi ha ka 18 tarik, Naiwieng bad ka ban sa kut ha ka 24 tarik, Nohprah. Ki MLA kin sa long ki nongïalam ha kaba ïadei bad ki jingpyntreikam ki ban long baroh shi bnai katkum ki konstitwensi. Ka la khmih lynt na ka bynta ban ïoh ki jingai jubab jong ki briew shaphang ki skhim kiba bun jong ka sorkar na ka kynhun Left.
