Shillong, Nailur 25
Ar ngut ki rangïakura ka Jylla, u Shanborlang Marba -niang bad u Ïarapborsing Kharbani ki la khur ïa ka jingjop ha ka rynsan ïakura jong ka United Profes-sional Boxing ba la pynlong da ka Indian Boxing Council ha ka miet jong ka sngi U Blei ha Gujarat.
Ha kane ka kynti kaba mynta ka synjuk ïakura jong ka Meghalaya Profes -sional Boxing Council (MPBC) ka la phah lai ngut ki rangiakura, hynrei u Elbin Rani u la shah rem noh.
Kane ka long ka sien kaba hynriew ïa u Shanborlang ban kiew rynsan ha kane ka jingïakura, ha kaba u la lah ban pynliem ïa u Anakapalli Madanpratap uba na Andhra Pradesh lyngba ka knockout ha ka wat kaba lai jong ka kyrdan ïakura Super Fly Weight 52kg.
Kumba ka paw kane ka long ka sien ba hynriew kaba u la kiew rynsan ha ka Professional Boxing naduh ba u la khur jingjop ha ka Marine Pro Boxing Promotion ha u snem 2022 kaba la long ha Mumbai, katba u la ïakhaid pat saw sien ha ka Professional Boxing kaba la long ha u snem 2022 bad 2023 ha Manipur bad Delhi, bad ïoh jingjop ha Gujarat.
Katba u Ïarapborsing u la lah ban pynliem ïa u rang -ïakura uba na Telangana u Devavath Anil Kumar ha ka kyrdan ïakura jong ka Bantamweight 53.5kg.
Wat la u Ïarapborsing u la mad ïa ka jingshah rem ha ka jingïakhun kaba nyngkong ha Manipur ha u snem ba la lah, pynban ha kane ka kynti um shym la kynran dien na ka bynta ban pynliem ïa utei u rangïakura uba na Telangana
Te kumta u Ïarapborsing un leit ïashim bynta biang ha ka 10 tarik u Risaw mynta u snem ha ka nongbah Delhi na ka bynta ka wat kaba hynriew jong katei ka kyrdan ïakura.
Ha kawei pat ka jingïakhun jong ka kyrdan ïakura Featherweight 57kg, u Elbin Rani u la shah rem ha u Salim Khan uba na Haryana.
Kat kum ka jingïathuh da ki bor pynïaid ka MPBC, la ong ba na ka liang ka Indian Boxing Council ka la thmu ban plie lad ïa u Shanborlang ba un leit ïakhun sa sha ka rynsan ïakura jong ka World Boxing Council, hynrei kane kan shong tang lada u ïoh ki lad jingïarap ne ki nongkyrshan na ka bynta jong u namar ka jinglut jingsep ka long kaba bun.
