Shillong, Nailur 25
San sngi shwa ban pynlong ïa ka 2nd Sohra International Half Marathon, ki dkhot ka Organising Committee jong kane ka jingïakop ki la pynlong ka jing -leit jurip ïa ka surok naduh Laitsohpliah haduh Sohra ha ka Lah Sngi U Blei.
Ha kane ka jingleit jurip la ïadon lang ka Director ka tnat ïalehkai ka Kong Isawanda Laloo (IAS) bad kaba long ruh ka Chairman jong ka Organising Committee (OC) kumjuh u Bah John F. Kharshiing, Working President ka MSOA, bad Co-Chairman, Kong H. Nayak (IAS), SDO ka Sohra Civil Sub division, Bah Finely L. Pariat, Organising Secretary, lem kiwei ki dkhot na na tnat ka koit ka khiah, Police bad kiwei.
Lah ban kdew ba ha kane ka jingïakop kaba ban long ha ka sngi Saitjaiñ (30 tarik) yn khang haduh lai kynta ïa ka surok naduh Laitsohpliah sha Sohra haduh Mawsmai naduh ka por 6 haduh 9 baje mynstep.
