Cotonou, Nailur:
Kumba 30 tam ki briew ki la ngat ha ka apot bad khlad ha ka jingpluh ka jaka buh umphniang ha ka shnong Benin hajan khappud jong ka Nigeria, kaba la jia ha ka Sngi Saitjaiñ ha kaba la shem ïa ka metiap ba la ingkhong jong kitei kiba khlad napoh jong katei ka jaka ha katei ka sngi.
Katei ka jingpluh ka la jia ha kawei ka jaka kynshew umphniang kaba don ha ka thaiñ Shathie jong ka shnong Benin hapoh Seme Podji, ha kaba ki kali bad ki thuk-thuk ki ju leit ban pynlang umphniang ha katei ka jaka na ka bynta ban ioh ban pyndonkam pat hadien.
Ka Nigeria ka long ka ri kaba khlaiñ bha ha ka jingpynmih ïa ka umphniang bad kumjuh ruh kaba jur ha ki kam khaïi umphniang beaiñ ha kylleng sawdong jong ka ri Nigeria baroh kawei bad khamtam ha ki bynta khappud ha kaba ki don bun sien ki jingjia kem ding bad jingpluh jong ki pipe pyntuid umphniang bad ki jaka pynlang umphniang kiba shu bthei bad kem ding hi namar ka jing bym biang jong ka rukom buh bad ka jaka ka bym shngaiñ.
Ki paidbah kiba sah hajan jong katei ka jaka ba pluh ha katei ka Sngi Saitjaiñ, ki la iathuh ba da ka jingkyndit ki la ïohsngew ïa ka jinglynñiar jong ki briew kiba don ha katei ka jaka, ha kaba ki la ioh ïa ka ding kaba la klang bad kaba la heh bha bad kumta ki la pyntip mar-mar sha ki bor pyniaid jong katei ka thaiñ naka bynta ki jingiarap.
U Myntri ka tnat kam poh iing jong ka Benin u la iathuh ba katei ka jingpluh ha katei ka sngi ka long kaba la shyrkhei bad kaba la khlaiñ haduh katta. Hynrei um shym la ai jingtip shai pat ba ha kano ka rukom bad na kaei ka daw kaba la pynlong ïa katei ka jingpluh ha katei ka sngi.
Tad haduh jong ka step Sngi U Blei, la ioh jingkheiñ ba ki don 34 ngut kiba khlad ha katei ka jingjia kynthup ïa 2 ngut ki khyllung. Bad ïa ka met ba ingkhong jongki la ioh ban tam napoh jong katei ka jaka ba la dep pluh bad bam duh da katei ka ding.
Kumjuh ruh utei u Myntri u la iathuh ba ki don sa 20 ngut pat kiba dang don hapoh ka hospital bad kiba dang shah sumar bad katto katne napdeng jongki ki la mynsaw jur bad ki don hapdeng ka jingma kaba khraw.
