Khliehriat, Nailur 25
Ha ka jingkhie bitar pyrshah ïa ka National Highway Authority of India (NHAI) halor ka jingjulor bad jot rathai jong ka surok bah ne ka National Highway-6, ki paidbah jong ka East Jaiñtia Hills District ki la pynlong da ka jingïakhih shong kyllaiñ mungor bad thiah madan hapdeng surok bah baroh shi sngi ryngkat bad ka jingthung kba bad khwai dohkha ha ki thliew bah kat ki pung rit jong katei ka surokbah ha ka Lah Sngi U Blei mynta ka taïew.
Katei ka jingïakhih kaba khampher ka la sdang shwa da ka jingïaid paidbah na phyllaw jong ka Community Hall Khliehriat West shaduh ka surok bah ha ka shnong Khliehriat kaba dei ka nongbah jong ka East Jaiñtia Hills District.
Ha kane ka jingïakhih ba la khot pynlong da ka Khasi Students Union (KSU) East Jaiñtia Hills District la wan ïashim bynta da ki spah ngut ki paidbah kynthup lang ki longkmie bad samla kumjuh ki seng bapher bapher ka district.
Khnang ban pyllait na kano-kano ka jingdheng kali bad jingjia ba sngewsih, ki bor pynïaid district jong ka East Jaiñtia Hills ki la kyrpad ïa ki bor pynïaid district jong ki district kiba marjan ban nym shah ïaid ïa ki trok sha East Jaiñtia Hills District.
Ki la don 8 tylli ki trok shipai BSF kiba wan na ka thaiñ Silchar kiba la poi ha katei jaka ïakhih bad shah pynphai noh.
Haba phai sha katto katne na ki nongkren ha ka jingïalang, u Bah Kynjaimon Amse u la ther tyngeh ïa ki ‘social media warriors’ kiba heh nia tang ha facebook hynrei ynda la dei ban hiar thma ki kynran dien.
U la ther ruh ïa ki ophisar sorkar ki bym shym la wan mih sha katei ka jingïakhih lane ban ïakren bad ki paidbah nongïakhih, hynrei u la ong lada dei ka public hearing jong ki karkhana pynmih dewbilat, ki ophisar sorkar ki leit ban sah miet lypa.
U la ong ha ka public hearing kaba dang shu dep ha Thangksai, ki ophisar sorkar bad baroh ki pulit jong ka East Jaiñtia ki leit sah miet lypa sha Topcem, hynrei mynta ha kane ka jingïakhih surok uwei u ophisar ruh ym ïohi dur.
U Bah Amse u la kyntu ïa u Myntri Rangbah ka jylla u Conrad K Sangma bad Bah Prestone Tynsong ban hiar jurip dalade ïa ka surokbah naduh na Jowai shaduh Malidor khnang ban sngewthuh ïa ka jingeh jong ki paidbah.
U la ong ha ka RTI kaba u lap, ka NHAI ka khrong pisa palat shispah klur na kane ka surok naduh ba la shna ïa ka, hynrei ka mang pisa pat tang 2 klur ne 3 klur ban maramot ïa ka surok.
U samla Streamly N Suchen, President KSU East Jaiñtia Hills District Unit, u la ong ka East Jaiñtia ka dei ka District kaba khlaiñ bha ha ka jingpynmih khajna ïa ka Sorkar Jylla, hynrei sngewsih pat ban ong ba ki kam pynroi ki shah khanglad ban wan hapoh kane ka district.
U la ong ka sorkar ha ka jingïalam u Conrad ha ka jaka ba kan pynbha ïa ka surok bad kiwei kiwei ki kam pynroi, hynrei ka pynkhlaiñ ïa ka seng bad thied jaka shabar ka Jylla Meghalaya ban shna ïa ki ophis treikam jong ki.
U President ka Seng Samla Shnong Umkiang (SSSU), samla Ellen Mynthlu, u la ong kiba don ha Secretariat sngewbha hiar leit peit da la ki jong ki khmat ïa ka surok sha ka thiañ Narpuh bad wat nym shong batai tang ha Secretariat khnang ban lap shisha ïa ka jingeh jong ki nongshong shnong khamtam ki khynnah skul kiba hap ban ïaid lyngba ki ktieh ba rben haduh ban poi sha skul.
U la ong ba ha ka pang ka shitom ban ïaid ïa kane ka surok ka long kaba eh bad shem jynjar ban ïa kaba ïaid ïa ki krem ki kroh bad kane ka buh jingeh haduh katta katta ïa ki paidbah ka thaiñ Narpuh.
U President ka Khasi Jaiñtia Tourist Maxi Cab Association, Bah Pyllaitdame Ladong u la ong ka jingsniew jong ka surok kaba la dap sa tang ki krem kiba heh hapdeng surok ka la buh jingma ïa ki paidbah, ki nongñiah kali kumjuh ïa ki kali hynrei watla katta u la ong haduh mynta ym pat la don kino kino ki jingjia mynsaw lyngba kane ka surok kumta u la kyntu shwa ba kan jia kaba kum kata jingjia sngewbha maramot noh ïa ka surok.
U samla KS Suchiang, General Secretary KSU uba dei ruh u President ka KSU Narpuh u la ong kum shibynta ka jingïakhih la rai ban kyntu ïa ki paidbah ba don kali kumjuh kiba kamai ban sangeh ïaid kali ha ki bynta u pud ka East Jaiñtia Hills District.
Kane ka jingsangeh ïaid kali ka sdang naduh ka por 7.00 baje janmiet haduh 5 baje mynstep mynta ka miet bad kan neh shi taïew kata tang ha ki por miet.
