Shillong, Nailur 25
Ka G.S.S.S Alakhpura kaba na Bhiwani, Haryana bad ka St. Patrick’s, Gumla, Jharkhand ki la long ar tylli ki kynhun ki ban ïaknieh ïa ka nam lahduh ha ka 62nd Subroto Cup Junior Girls (U-17) Inter School International Football Tournament.
Ha ka jingïakhun semi final kaba la long ha ka Lah Sngi U Blei ha ka nongbah Delhi, ka G.S.S.S Alakhpura ka la pynliem noh ïa ka Ananda Purna School of Science kaba na Manipur da 1-0 kol, katba ka St. Patrick’s ka la jop da 2-0 kol ïa ka NCC na ka Mizoram.
Te kumta ka jingïakhun final kan long ha ka sngi Ba-ar ha ka por 4:30 jammiet.
Haba phai sha ka jingïaid lynti ka kynhun ïalehkai U-17 jong ka Saiden Secondary School kaba na Ri Bhoi District ka la poi noh sha kaba kut ha ka quarter final hadien ba ka la shah rem noh da 1-0 kol ha ka NCC, Mizoram.
Hashwa ba kan jam sha ka quarter final, kane kynhun ïalehkai U-17 ka Jylla ka la bat ïa ka kyrdan ba hakhlieh jong ka Pool-G hadien ba khur jingjop ha baroh lai sien lynter kata ïa ka Goa (2-0 kol), ïa ka Kendriya Vidyalaya Sangathan (KVS) da 4-0 kol bad ïa ka Uttrakhand haduh 11-0 kol.
Te kumta ka Jylla kan sei sa ar tylli ki kynhun ïalehkai jong ki shynrang, kata ka Assam Rifle Public School kaba na East Khasi Hills ha ka U-17 bad ka H.K. Sing Secondary School kaba na West Jaiñtia Hills ha ka U-14.
