![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Nailur 25
Ka West Jaiñtia Hills District Cricket Association ka la pynliem noh ïa ka West Khasi Hills DCA da 7 wiket ha ka Zone 1 (Group-B) jong ka U-19 Boys Inter District Cricket Tournament kaba la long ha ka lah sngi U Blei ha madan Umbuda, Nongpoh.
U Maremdor Sutnga u la lah ban pynpaw ïa ka jingtbit ha ka ban tied bad kawang bol na ka bynta ban khur ïa ka nam Player of the Match. Une u rangïalehkai u la lah ban khur 4/21 ha kaba ka la pynlong ïa ka WKH ban kamai tang 101 run bad u la lah ruh ban long kum u nongtied uba khlem shah pynkhyllem na ka bynta ban tied 34 run.
Ha kane ka jingïalehkai, ka WKH kaba la jop ïa ka kynting pisa ka la shimti ban tied nyngkong ha kaba ka la shah pynkhyllem noh baroh ki nongtied ha ki 23.1 over. Watla kiba bun ki la shah pynhap wiket, hynrei u Pynïerlang Shangdier u la long tang marwei na ka bynta ban tied 47 run na ki 33 bol (4 ‘four’ bad 4 ‘six’.
U Maremdor u la long uba kynsai napdeng ki nongkawang bol ka WJH, hynrei u la ïoh ban kawang bol tang 4.1 over. U Namewanki Pakynteiñ u la ïoh ban khur 4/29.
Watla ka la shah pynhap lai wiket, pynban ka WJH kam shym la shem jingeh eiei na ka bynta ban kynjoh sha ka thong ha ki 12 over. U Maremdor u la ïoh ban khyrwit 34 run na ki 26 bol kynthup ïa 3 ki ‘four’ bad ki ‘six’, katba u Namewanki u la long u nongtied ban khlem shah pynkhyllem na ka bynta ban tied 12 run. U Ewanmidao Pyrtuh u la tied 19 run na ki 16 bol.