
Shillong, Nailur 26
Ka India ka la khur biang ïa ka takma ksiar kaba lai ha ka Asian Games 2023 lyngba ka kynhun ki nongshong kulai ne ka Dressage Equestrian kata u Anush Agarwalla, Hriday Vipul, Divyakriti bad Sudipti Hajela ha ka sngi Ba-ar.
Kane ka kynhun ka la lah ban kamai 209.205 na ka bynta ban khur ïa ka takma ksiar bad kane ka long ka sien kaba nyngkong eh ha ki 41 snem na ka Equestrian ban khur ïa kane ka takma.
Hadien kane ka lympung ïalehkai kaba la neh kumba 10 kynta, u Agarwalla, Chheda, Divya-kriti bad ka Hajela ki la lah ban kynjoh sha ka thong.
U Anush Agarwalla bad u kulai jong u (ETR) u la lah ban kamai ha ki 71.088 katba u Hriday Chheda-Emerald u la kamai 69.941. Ka Divyakriti Singh bad ka Adrenalin Firdod ki la kamai 68.176. Ka Sudipti Hajela bad ka Chinski ki la kamai 66.706.
Te kumta ka India ka la lah ban kamai 209.205 ha kaba ka la long kaba heh duh ban ia ka China, kaba la wan ba-ar da kaba kamai 204.882.
U Anush Garwalla u la kamai 71.088 katba u Hriday u la ïoh 69.941 bad ka Divyakriti ka la ïoh 68.176. Baroh lai ngut ki la lah ban pynthikna na ka bynta ban pynliem ïa ka China bad Japan, kiba long ki ri kiba don jingkyrmen ban khur ïa ka jingjop.
Kane ka long ka sien kaba nyngkong eh ha kane ka jingïa-lehkai ha kaba ka India ka la lah ban khur ïa ka takma ksiar ha ka jingïalehkai jong ka dressage. Ka takma kaba khatduh eh na ka dressage, ka dei ka takma rnong ha katei ka lympung kaba la long ha u snem 1986.
Ka India ka la khur ïa ka takma ksiar ha ka jingïalehkai equestrian jong ka Asian Games 1982 kaba la long ha nongbah Delhi.