Shillong, Nailur 26
Ki ar tylli ki kynhun ïalehkai phutbol ka Jylla ki la long ba la pynkhreh ban leit ïashim bynta ha ka lympung ïalehkai 62nd International Subroto Cup Football Tournament ka ban long mynta u bnai ha ka nongbah Delhi bad ha Bengaluru.
Ka kynhun ïalehkai Under-14 jong ka H.K. Sing Secondary School kaba na West Jaiñtia Hills kan leit ïashim bynta ha Bengaluru, katba ka Assam Rifle Public School na East Khasi Hills kan ïashim bynta ha ka nongbah Delhi ha ka kyrdan ïalehkai Under-17 jong ki shynrang.
Watla ka kynhun ki ‘thei ïalehkai Under-17 jong ka Saiden Secondary School na Ri-Bhoi Dis-trict ka la wanphai noh sha la ïing hadien ka jingshah rem noh ha ka quarter final, hynrei kitei ki ar tylli ki kynhun jong ki shynrang ki la khmih lynti ban ïalehkai bha ha katei ka lympung bad ruh ban wanrah nam bad burom ïa ka Jylla hi baroh kawei.
Ha katei ka lympung, ka H.K. Sing SS ka la don ha ka Pool-A kaba kynthup lang ïa ka Sainik School, Kendriya Vidya-laya Sangathan (KVS), Tripura bad ka Navyodaya Vidayala Samiti (NVS). Te kumta katei ka kynhun hapoh ka jingïalam u Hopingstone Suting (coach) kan pynkhreh ban ïakhun nyngkong pyrshah ïa ka Sainik School ha ka 1 tarik u Risaw.
Katba ka Assam Rifle hapoh ka jingïalam u Badamut Riahtam (coach) ka la don ha ka Pool-A kaba kynthup ïa ka Nav-yodaya Vidayala Samiti (NVS), Tripura bad ka Kendriya Vidyalaya Sangathan (KVS). Te kumta kan ïakhun nyngkong pyrshah ïa ka Navyodaya Vidayala Samiti (NVS) ha ka 4 tarik u Risaw.
Hashwa ba kine ki kynhun kin mih na kane ka nongbah, na ka liang ka tnat ïalehkai jong ka Sorkar Jylla ha ka sngi Ba-ar ka la pynlong ïa ka jingïalang kaba kyrpang ha conference hall jong katei ka shlem treikam na ka bynta ban kyrkhu kyrdoh ryngkat ki kyntien kitbok kitrwiang ïa kitei ki ar tylli ki kynhun ba kin ïalehkai bha ha katei ka lympung khnang ba ki lah ban kynjoh shaka thong.
Ha kane ka sngi la ïadon lang u Deputy Director katei ka tnat u Bah P.B War Nongbri, kumjuh u Assistant Director bad uba long ruh u District Sports Officer ka West Jaiñtia Hills u Bah K. Passah, u DSO East Khasi Hills u Bah O. Mawthoh, Bah Khlaiñ Pyrkhat Syiemlieh (football coach), ki nonghikai jong kitei ki skul ryngkat ki kmie ki kpa jong ki khynnah.
