Jowai, Nailur 26
Ka lympung ïalehkai 1st Division Football Tournament na ka bynta ka Chatister Kharkongor Memorial Trophy ba la pynïaid da ka West Jaiñtia District Sports Association (WJDSA) ka la sdang ha ka sngi Ba-ar ha Kiang Nangbah Stadium kaba ha Ladthadlaboh, Jowai.
Ha kane ka lympung la wan ïashim bynta da 12 tylli ki kynhun ba la phiah ha ki artylli ki Pool (A & B). Ki kynhun kiba don ha ka Pool-A ki long ka Sabahmuswang, Mookyndur, Demthring SC, Mukhla Evergreen, Moosyiem Shangpung bad Nangbah Ïawmusiang. Katba ha ka Pool-B ki long ka Sohmynting, Khliehïongriang, Wahïajer, Dulong, Luti Tuber SW bad ka Moosalyngkat.
Haba phai sha ki jingïakhun ha kane ka sngi, ka Sabahmuswang ka la pynliem noh ïa ka Mookyndur da 2-1. Ïa ki kol jong ka Sabahmuswang la thep da u Dayo Shylla ha ka minit kaba 42 bad u Lakhon Dhar (47). Hynrei shwa ban wai ka Mookyndur ka la lah ban pynphai kylla lyngba u Jomsing Pariat (90+9).
