Shillong, Nailur 26
Ka jingïalehkai bha u Avinash Rai ha ka liang ban tied bad u Ayushman Rabha ha ka liang kawang bol ka la pynlong ïa ka Shillong Cricket Association ‘A’ ban pynliem noh ïa ka East Jaiñtia Hills District Cricket Association da 248 run ha ka Zone 1 (Group-A) ha ka lympung ïalehkai U-19 Boys Inter District Cricket Tournament kaba la long ha ka sngi Ba-ar ha Umbuda, Nongpoh.
Hadien ba ka la jop ïa ka kynting pisa, ka SCA-A ka la shimti ban tied nyngkong ha kaba ka la lah ban kamai 348 run bad shah pynkhyllem baroh ki nongtied ha ki 39.4 over, katba ka EJH ka la lah ban kamai tang 100 run ha ki 26.1 over.
U Avinash u la lah ban pynpaw ïa ka jingtbit kum u nongtied ha kaba u la ïoh ban khyrwit 150 run na ki 108 bol, kynthup ïa 24 tylli ki ‘four’ lem bad hynriew tylli ki ‘six’. Une u rangïalehkai u la lah ban kynjoh sha ki 129 run ha ka wiket kaba ar jong ka jingïatied lang bad u Pushkar Raj, uba la tied 67 run na ki 58 bol (8x4s, 2x6s). Kiwei pat ki nongtied kiba la noh synñiang ki long u Shavian Blah (24 run na ki 16 bol) ryngkat ki 38 run na ki 13 bol ba la tied da u Angkit Tamang, kynthup ïa san tylli ki ‘six’.
Watla yn shym la don na ki nongkawang bol ki ban lah ban ïalehkai bha, pynban ki dangdon katto katne na ki nongkawang bol ka EJH kiba la lah ban pynhap wiket kiba kynthup ïa u Dev Rai (3/46), u Bitu Lama (3/57) bad u Jeffre Chyrmang (1/68).
Watla ka la donkam ban kamai run ha ki 8.73 over na ka bynta ban khur ïa ka jingjop, pynban ka EJH ka la sdang ban suki bha ha ka rukom tied ha kaba ka la kynjoh sha ki 45 run lyngba ka jingïatied lang hapdeng u Amarjeet Gupta (31) bad u Jeffre (27). Hynrei ka jinglah ban ïalehkai bha u Ayushman, uba la lah ban khur 5 wiket ka la pynlong ïa ka EJH ban shem jingeh ban kynjoh sha ka thong.
Te kumta u Avinash u la khur ïa ka nam Player of the Match, hynrei ïa u Ayushman la ithuh lang kum u rangïalehkai ba kynsai.
Ka jingïalehkai ha ka sngi Balang kan dei kaba khatduh jong ka group ha kaba ka SCA-B kan ïakhun pyrshah ïa ka Ri-Bhoi DCA ha ka Zone1 (Group-A).
