Shillong, Nailur 26
Ka kynhun ïalehkai U-19 ka ri India ka la jam sha ka semi final ha ka lympung ïalehkai SAFF U-19 Championship, hadien ba ka lah ban pynliem noh ïa ka Bhutan da 2-1 kol ha Dasharath Stadium kaba ha Kathmandu, Nepal.
Kane ka jinglah ban pynthikna ka la wan urlong lyngba u Gwgwmsar Goyary bad u Ricky Meetei. Kaba kham sngewtynnad hangne ba uwei na ki rangapkol ka Jylla, u Lionel Daryl Rymmei u la ïoh ban mih madan naduh kaba sdang.
Ha ka kylla step kine ki kynhun ki la ïakhaid mar shi kol. U Jigme Namgyel u la ïoh ban pynkhih jar nyng-kong eh na ka bynta ka Bhutan ha ka minit kaba 20, hynrei hadien shiteng kynta ka India ka la lah ban pynphai kylla lyngba u Gwgwmsar Goyary ha ka minit kaba 36 na ka bynta ban ïakhaid haduh kaba kut jong ka kylla step. Ka India ka la pynbud biang ïa ka kol kaba ar lyngba u Ricky Meetei ha ka mint kaba 64 na ka bynta ban khur syndon ïa ka jingjop.
Haba phai khyndiat ha kane ka jingïaid lynti ka India ha ka Group-B jong kane ka lympung, ha kaba ka la lah ban pynliem ïa ka Bangladesh da 3-0 kol. Ka jingjop ka Bhutan da 4-3 kol ïa ka Bangladesh ka la pynlong ïa ka India ba ka donkan ban pynïakhaid ha kane ka jingïakhun kaba khatduh na ka bynta ban bat ïa ka kyrdan ba hakhlieh jong kane ka group.
Te kumta ka India kan ïakynduh pyrshah ïa ka Nepal kaba la wan ba-ar ha ka Group-A, ha ka sngi Balang ha ka por 5:15 janmiet.
