Bangkok, Nailur:
Ki pulit ka Thailand ha ka Sngi Nyngkong ki la leit ban khynra ha ka jaka sah jong uwei u heh pulit katei ka ri halor ka jingsuba don kti ban pyniaid ia kawei ka jing-ialehkai khalai da kaba ‘Online’ hapoh jong ka network ‘Betflix’.
Namar kumba la iohi ba ki rukom pyniaid ha katei ka jinglehkai ka long kaba be-aiñ hapoh ka ri Thailand bad ki bor pyniaid ka Thailand ki la dep pynbna ba la khang noh ia baroh ki jingïalehkai khalai hapoh ka ri namar ka jingbym shngaiñ bad kumjuh ruh namar jong kiwei kiwei ki daw kiba lah ban ktah ia ka jinglong-jingman hapoh ka ri.
Kumta, ha katei ka sngi la iohi ia bun tylli ki kynhun jong ka SWAT kiba la leit ban khynra ha kumba 30 tylli ki jaka ba la i-shan khmat kynthup ia ka iing u Deputy National Police u Surachate Hakparn kaba don ha phang pdeng jong ka Bangkok.
La ong ba ia u Surachate, la ju tip bad ithuh bha hapoh Thailand haba iadei bad ka jinglah jong u ban mih khmat sha ki lad pathai khubor bad ban pynbna shaphang ki jing-leit wad bniah ba ka tnat pulit ka ju pynlong man ka por. Wat la katta, la ong ba utei u heh pulit u la kyntait war ban ïadon kti ha kum kitei ki jait kam be-aiñ bad kiba long pyrshah ruh ia ka aiñ jong ka ri.
Haba iakren bad ki lad pathai khubor ha katei ka sngi ba leit ban khynra hapoh ka jaka sah jong u, utei u heh pulit u la ong ba um don jingtieng-jingsyier eiei khyndiat ruh namar um shym la don kti ha katei ka kam ba la pharep bad suba don kti ia u.
U heh pulit Trairong Phiwpan u la iathuh ba katei ka jingleit khynra ka long halor ka jingshem ba katei ka website ‘Betflix’ ka ju pyntreikam ia katei ka jinglehkai khalai kaba long be-aiñ wat hadien ba ki bor pyniaid jong ka ri ki la maham bad khang pyrshah ba pyniaid ia kum kitei ki jait jinglehkai hapoh jong ka ri.
Kumta, ka kynhun wad bniah ka la jer kyrteng ia 23 ngut ki briew kiba lah ban don kti ha katei ka kam, kynthup ruh ia 8 ngut ki heh pulit watla u Surachate u la kyntait ba um shym la don kti eiei haba iadei bad kane ka kam.
Ki heh ka kynhun wad bniah ki la iathuh ba kim tip tikna ia ka dur- ka dar ne ka kyrteng jong utei u heh uba pyniaid ia katei ka website bad ia katei ka jingleh kai be-aiñ hynrei la bna ba ki ju khot sin ia u da u ‘Big Joke’.
Katei ka jingleit khynra ha kane ka por, la ong ba ka long ruh hashwa jong ka sngi ban jied thymmai noh ia ki heh pulit ha katei ka ri, ha kaba u Surachate u long uwei napdeng kitei ki heh pulit ba thymmai kiba lah ban shah jied bad ban shah pynkiew kyrdan.
