Nongpoh, Nailur 26
Ka Ri Bhoi District Sports Association (RBDSA) ha ka sngi Ba-ar ka la plie pyrda ïa ka lympung ïalehkai phutbol ba la tip kum ka Ri Bhoi General League ha madan ïalehkai jong ka Umsning Sports & Cultural Club kaba don ha Patarim, Umsning.
U President jong ka Mawkhar Sports Club, u Bah Ransom Sutnga u la long kum u kongsan ha ka jingïadon ryngkat lang ki nongïalam ka RBDSA ba kynthup ïa u Bah R.B Shadap, President, u Bah R.R Makdoh, Adviser, Bah Hamarbajop Wahlang, Deputy Commandant ka 6th Battalion, Umran lem bad kiwei kiwei.
Ha kane ka lympung ïalehkai, na ka liang ka RBDSA ka la pyntip ba kin don haduh 65 tylli ki kynhun bapher bapher na kylleng jong ka thaiñ Ri Bhoi ki ba la pynkhreh wan ban ïashim bynta bad ha ka sngi sdang mynta ka sngi, la wan ban ïalehkai da ka kynhun jong ka Mawkhan SC pyrshah ïa ka Umkei SC.
Haba phai sha ka jingïalehkai khyndiat hapdeng kitei ki ar tylli ki kynhun, kata ka Mawkhan SC pyrshah ïa ka Mawkei SC, ka jingïakhun ka long kaba ïakhaid bha naba baroh ar kitei ki kynhun ki la sei ïa la ki sap ki phong ban ïoh ïa ka jingjop. Ha kylla step jong ka jingïakhun, baroh ar kitei ki kynhun ki la ïoh ban thep mar shi kol, bad ha ka kylla miet ka jingïakhun ka long kaba la ïakhaid bha ha kaba baroh ar tylli ki kynhun ki la ïoh biang ban thep mar shi kol, kaba la pynlong ïa katei ka jingïakhun ban kut noh ha ka jingïakhaid da 2-2 kol.
