Houston, Nailur:
Katkum ki khubor, la ong ba uwei u nongthied na kawei ka dukan die jingbam ‘Fastfood’ u la shah siat ha ka nongtrei jong katei ka dukan hapoh United States hadien ka jingiania hapdeng jong ki halor ka jingjah rngai jong katto katne ki jingbam ha katei ka jingjia.
Katkum ka ejahar ba la leit ban ujor hapoh Houston, u Anthony Ramos u la iathuh ba ha katei ka sngi, ma u ryngkat ka kurim lem bad ka khun, ki la leit sha ka George Bush Intercontinental Airport bad ki la sangeh ha ka jaka ba katei ka dukan ka don bad katei ka longiing ka la leit ban ‘order’ ia shibun ki jingbam kyllum ‘combo’ hynrei ki lap ba katto katne ki jingbam kiba dei ban kynthup lang hangta, ki dang jah bad kim shym la thep ne ai lang ha katei ka song ba la ‘order’. Hynrei, la ong ba haba u Ramos u la leit ban ujor halor katei ka jingshem, ka la mih pynban ka jingiania na ka liang ki nongtrei jong katei ka dukan bad utei u rangbah, ha kaba kawei na kitei ki nongtrei ka la sei da ka suloi bad thmu ban siat sha ki bad kaba la pynlong ia kitei ki 3 ngut ba kin phet krad noh na katei ka jaka.
Kane ka la jia naduh u Lber jong u snem 2021, hynrei katei ka video ka dang shu lait paidbah ha ka Sngi Nyngkong.
Ha katei ka video la iohi ia katei ka nongtrei ba la ithuh kum ka Alonniea Fantasia Ford, kaba la sei ia ka suloi bad kaba la pynkhreh ban siat ia utei u rangbah ha katei ka jingjia bad wat hadien ba kitei ki 3 ngut ki la leit phet noh sha ka kali ba ki pynieng habar, katei ka nongtrei ka la ioh ban siat kumba 2 kuli sha katei ka kali ba ki shong.
Katei ka jingiania bad ka jingïakynad ka la neh kumba 15 minit eiei bad u nongïasaid aiñ jong katei ka iing, u la iathuh ba ka jingshisha ka long ba kitei ki nongtrei ki la leh thok bad ki la pynduna ia ki jait jingbam ba katei ka iing ka la order ha katei ka por.
Wat la katta, la ong ba na ka liang jong katei ka dukan bam, ka la kyntait halor katei ka jing kynnoh.
Hadien ba la dep ban tian bishar, ka Ms Ford ka la shah pynngat ha ki katto katne ki kyndon pynkheiñ aiñ halor katei ka jing pyndonkam jongka ia katei ka tiar siat kaba long ka jingma kaba khraw ia ka jingim jong kiwei pat. Bad ka la shah rai ruh ban pynshong patok haduh 1 snem kynthih.
