Toronto, Nailur:
U Myntri ka tnat ïada Ri jong ka Canada, u Bill Blair ha ka Sngi Ba-ar u la pynpaw ia ka jingsngew khia halor ki rai ba ka India ka la wanrah naduh ka jingkhang noh ban sam ia ki ‘Visa’ sha ki nong Canada bad kumta ruh u la kyntu ia ka India ba kan iatrei lang bad katei ka ri haba iadei bad ka jingwad bniah ba ka Canada ha kane ka por ka dang pyntyllun shakhmat ban lap la ka India ka ïadon kti lang ne em ha ka jingpyn-iap ia jaidbynriew Sikh uba long u nongshong shnong pura jong ka Canada.
Namar kumba la iohi naduh kine ki khyndiat sngi ba la leit jong ka taiew ba la lah, ka la mih ka jingïakynad hapdeng ka India bad ka Canada halor ka jingkynnoh jong u Myntri Rangbahduh ka Canada- u Justin Turdeau ba ki don ki briew ba la phah da ka sorkar India bad kiba la leit ban ïadon bynta lang ha ka jingleit pyniap ia utei u lehnoh hapoh u pud- u sam jong ka ri Canada hi. Ia utei u lehnoh la ithuh kyrteng u Hardeep Singh Nijjar, uba la don 45 snem ka rta bad uba la shah siat iap ha ka 18 tarik u Jylliew hapoh British Columbia.
La ong ba ka India ha u snem 2020, ka la ñiew ia u Nijjar kum u lehnoh bad ka la jer kyrteng ia u ha ka thup jong ki dkhot lehnoh kiba ka India ka thwet bad ka kwah ban ioh kem halor ki jingthmu ban thombor ia ka India ha ki por ba la leit.
Hynrei, la ong ba hadien ba la ïohsngew ia ka jing pharep jong utei u Myntri Rangbahduh ka Canada halor ka jingiadon kti jong ka India ha katei ka jingpyniap ia utei u lehnoh hapoh Canada, ka India da ka jingbitar ka la kytait ia katei ka jingkynnoh bad ka la phah mih noh shi syndon ia u heh nong Canada ha katei ka por bad ka la ai por ia u ba un mih noh tang hapoh jong ki 5 sngi.
Hadien ba la mih ka jingïakynad hapdeng ka India bad Canada, kumjuh ruh na ka liang ki bor pyniaid ka United States, ki la kyntu ia ka India ba kan iatrei lang bad ka Canada ha katei ka jingwad bniah ban lap ia ka jingshisha la ka India ka ïadon kti ne em ha ka jingpyniap ia utei u lehnoh. Namar kumba la iohi ba ka daw jong ka jing bitar ka Canada halor katei ka jingjia, ka long namar ka jingshah pyniap jong utei u nong Canada hapoh u pud- u sam jong ka Canada bad kumta ka Canada kam sngewtynnad lada ki bor ba nabar kin leit ban leh donbor ne pyni bor hapoh u pud u sam jong ka.
