Ka jingïakhih ha East Jaiñtia Hills ha ka 25 tarik Nailur, 2023 ban pyrshah ïa ka jingbym maramot ïa ka surokbah National Highway – 6 ka la long ruh kaba pynbiria namar ki paidbah ki la pynlong ei da ka jingkhwai bad jingthung kba ha ki bynta kiba la kylla kum ki pung bad ki pynthor. Hynrei kane ruh ka dei ka pharshi ban siat ïa ka National Highways Authority of India (NHAI) halor ka jingbym leh eiei ban shim ïa ki sienjam ba donkam ban maramot noh ïa kane ka surok ha kaba wat ki MP na kane ka thaiñ ki la thoh da ka shithi sha u Myntri Sorkar Pdeng, u Nitin Gadkari, ba un phah maramot noh namar ka la pynthut palat ïa ka leit ka wan jong ki paidbah. Kiba kum kine ki jingïakhih ki dei ban long ruh wat ha sor Shillong namar ngi ïohi ïa ka jingjot rathai ki surok. Haba wat ha Shillong ka sorkar kam peit ban maramot ïa ki surok, ngin mutdur sa kumno ha ki thaiñ nongkyndong?
Ha katei ka jingïakhih ha East Jaiñtia Hills, la don kiba la pyni da ki jingtip ba la ïoh lum lyngba ka aiñ Right to Information (RTI) ha kaba ka NHAI ka la lah ban khrong pisa palat T. 100 klur na ka surokbah NH-6 naduh ba la dep shna ïa ka, hynrei ka jingmang pisa ban maramot ïa ka surok ka long tang hapdeng T. 2 – 3 klur eiei. Kat ïa ka surokbah yn mang tang katne haba la tip ba kane ka thaiñ ka dei kaba ïoh slap bha nalor ka jingbun ki kali kiba ïaid man la ka sngi. Balei ka NHAI kam mang pisa kham bun ban ïoh maramot kham bha ïa kane ka surok? Ki kontraktor kin trei katkum ka dor ba la ai lane duna ïa kata namar ki hap ban pyrkhat ïa ka jingïohnong jong ki ruh. Haba ka pisa ka la duna lypa, kumno ngin khmih lynti ba kata ka jingmaramot kan long kaba biang bad kaba lah ban shan bun bnai?
Ka sorkar u Conrad K Sangma ka dei ban shimkhia halor ka jingdonkam ban maramot ïa katei ka surokbah bad ba un leit ïakren hi bad u Gadkari. Ka jingud jong ki paidbah halor ka jingsniew jong katei ka surok ka dei kaba la neh la bun bnai mynta. La donkam ïa u Gadkari ba un tuklar hi dalade namar ngi ïohi ba u long uwei na ki Myntri Sorkar Pdeng uba ju sngap bha ïa ki jingeh jong ki nongshong shnong. U Conrad u dei ruh ban pan jingkyrshan lang na kiwei ki Myntri Rangbah ka thaiñ kum u Himanta Biswa Sarma, Zoramthanga bad kiwei halor ka jingdawa ban phah maramot noh ïa katei ka surokbah. Kine kiwei ki Myntri Rangbah ruh ki dei ban shimkhia lang namar ka National Highway – 6 ka pynïasoh shaduh ki jylla jong ki. Lada ki ïatylli lang baroh, ka NHAI kam banse ban sngap bad ban sdang ïa ka kam maramot surok khlem da pynslem shuh.
Ngi sngewdei ban kyntu ïa ki nongshong shnong kiba don ha kiwei pat ki bynta jong ka jylla ba kin shim nuksa na katei ka jingïakhih ha East Jaiñtia Hills bad ban sdang ïa ka jingdawa ban pynïoh surok thymmai lane ban maramot ïa kiba la don lypa tat haduh ba ka sorkar kan pei shkor. Kam myntoi ban ai surok khlem da maramot ïa ki man la ka por. Ym ju don surok kaba ym donkam ban maramot na ka por sha ka por. Na ka liang ki paidbah ki dei ban peitngor bha namar kam dei ban kut tang ha ka jingkhap ribon ïa ki surok thymmai. Lada ngim peitngor hi, ka sorkar kan ym patiaw. Haba ka sorkar kam patiaw, sa tang ki jingïakhih kiba long katkum ki aiñ bad ki bym wanrah ïa ka jingïaumsnam kiba donkam.
Hadien kane ka jingïakhih, ngin sa nang ïa khmih kaei ka Sorkar Jylla, Sorkar Pdeng bad NHAI kin leh. Lada ki dang ïai sngap mynthi, lehse ki paidbah ka East Jaiñtia Hills kin hap ban ïa mih paidbah shuh bad ban pynkhlaiñ ïa ka jingïakhih tat haduh ba ki bor ba dei peit kin leh ïa kaba dei. Ka sorkar ka dei ban pynkynmaw ïalade ïa ki kyntien kiba ka ju kren sha ki paidbah ba ka surok ka long kum u budlum na ka bynta ka ïoh ka kot kaba bha. Hynrei kumba ngi mad mynta, u budlum u la nang tlor haba shong kali namar ka jingsniew palat ki surok.
