Shillong, Nailur 27
Ka jinglah ïalehkai bha ka Ri-Bhoi District Cricket Association ha ka liang ban tied lyngba u Gaurav Narleng bad u Macdonald Makdoh ka la pynlong ïa kane ka kynhun ban pynliem noh ïa ka Shillong Cricket Association ‘B’ da 4 wiket ha ka U-19 Boys Inter District Cricket Tourna-ment kaba la long ha ka sngi Balang ha madan Umbuda, Nongpoh.
Ka jingkhmih lynti ban pynkhylllem kam shym la urlong ha kaba u Gaurav bad u Macdonald ki la lah ban ïalehkai bha ha ka ban tied na ka bynta ban pynlong ïa ka Ri-Bhoi ban kynjoh sha ka thong da kaba kamai 186 run.
Ïa kane ka jingïaleh-kai la pynduna sa tang 28 over ha baroh arliang. U Gaurav u la ïoh ban khyrwit 62 run na ki 3 bol kynthup ïa saw tylli ki ‘four’ bad hynñiew tylli ki ‘six’, katba u Macdo-nald u la ïoh 62 run na ki 35 bol, kynthup ïa phra tylli ki ‘four’ bad saw tylli ki ‘six’. U Gaurav u la shah pynkhyllem noh ha ki 19 over, hynrei u Macdonald u la lah ban pynurlong ïa ka kynhun ban kynjoh sha ka thong ha ki 23 over.
U Toshar Hajong u la long u nonkawang bol ba kynsai ka SCA-B ha kaba u la khur 2 wiket bad ailad 27 run, katba u Harris Ahmed u la khur 2 wiket bad ailad 48 run.
Kham hashwa ka SCA-B kaba la shimti ban tied nyngkong, ka la kamai 185 run bad shah pynkhyllem 8 wiket ha ki 28 over. U Trinayan Dutta u la long u nongtied uba la ïoh bun eh da kaba kamai 90 run na ki 76 bol (10x4s, 5x6s), katba u Manthan Dey u la tied 38 run na ki 24 bol (4x4s, 3x6s). Kine ki ar ngut ki la lah ban pynurlong ban kynjoh 81 run na ka bynta ka wiket kaba saw.
Hynrei kane ka jingïaid lynti ka SCA-B ïa ka pali ban tied nyngkong ka la kut noh hadien ba kitei ki ar ngut ki nongtied kiba kynsai ki la shah pynkhyllem noh hapoh mar ki 13 bol, katba u Trinayan u la ‘run out’, ïa u Manthan la kawang bol da u Benedict J. Makdoh (3/36).
