Shillong, Nailur 27
Ka lympung ïalehkai First Division Football League ba la pynïaid da ka Tyrsad Area Sports Association (TASA) ka la nangjam shaphrang ha kaba ka Mawponghong SC bad ka Nongspung SC ki la ïasam mar shi point hadien ba ki la ïakhaid mar 1-1 kol ha ka sngi Balang ha madan Tyrsad.
Ïa ka kol kaba nyngkong la ïoh ban thep shwa da ka Nongspung lyngba u Rosharles Kharphuli ha ka minit kaba 17, hynrei hadien lai minit ka Mawponghong ka la lah ban pynïakhaid kylla lyngba u Kosbor Kharryngki. Haduh kaba kut ym shym la don shuh ba lah ban ïathep kol watla ka Nongspung ka la ïakhun tyngeh ruh.
Haba phai sha ka kyrdan ïalehkai Third Division la jop da ka Lyngdoh Phanblang ïa ka Mawpalong SC bad Jop ka Raimulong SC ïa ka Phanñiewlah Neng SC.
Ka jingialehkai jong ka First Division kan bteng biang ha ka sngi Saitjain (3 tarik) hapdeng ka Bara FC pyrshah ïa ka Phudbyrnei SC ha ka por 3 baje janmiet, katba ha ka 2nd Division kan long hapdeng ka Nongwah SC pyrshah ïa ka Ramklang SC ha ka por 1:30 mynsngi.
