Ka jingïakynad hapdeng ki Karbi bad ki Pnar ha Lapangap ka la nang jur ha kine ki sngi haduh ba ki nongshong shnong ki la ïa rah da ki jri siat sim lem bad ki khnam bad ryntieh ban ïa siat iwei ïa iwei pat. Naduh ki rangbah haduh ki longkmie, ngi la ïohi ba ki ïakhun ban ïada ïa la ka jong. Kaei kaba jia hapdeng ki Pnar bad ki Karbi ha Lapangap kam dei kaba thymmai. Ka jingïakynad ka la don naduh kine ki bnai ba la lah haba ki Karbi ki la wan ban pynjulor ïa ki tynrai dieng ba la thung da ka shnong Lapangap. Suki pa suki ka jingïasniew ka la nang heh haduh ba kin da ïohi ïa ka jingïasiat da ki jri bad ki khnam. Kaba kum kane ka jingïakynad ngim pat ju kham ïohi ha khappud, hynrei ka jingïakynad kam dei ban jia lada ka sorkar Assam bad Meghalaya ki la ïashim khia naduh kaba sdang. Ka por ka dawa ïa ki arngut ki Myntri Rangbah – Himanta Biswa Sarma bad u Conrad K Sangma – ba kin ïakynduh bad ïakren halor ka Lapangap hashwa ban ïap briew na kano kano ka liang.
Ngim pat dei ban ïa klet kaei kaba la jia ha Mukroh ha u snem ba la lah ha kaba san ngut ki rangbah ki la kyllon ïap ha ka jingshah siat ha ki bor jong ka sorkar Assam. Mynta ki paidbah ki dang ïa rah tang da ki jri bad khnam, hato ki artylli ki sorkar ki ap haduh ba ki briew kin ïa rah da ki suloi ban ïasiat markylliang? Ngim kwah ban ïohi ïa ka jingïaumsnam ha khappud namar ka wanrah ïa ka jingduh ei jong ki mynsiem ba lui-lui. Haba ki artylli ki sorkar ki la mad bad ïohi nuksa na Mukroh, balei ki dang ïa shong kli kti bad leh kyllut haduh mynta? Ki ap ïano? Ki ap haduh ba kan da long kumno? Hato kam pat biang ban phah kham bun ki bor pahara lem bad ki majistor bad kin shong bad sah syndon ha kane ka shnong bad ban khanglad ïa ki kam ïakynad? Ka jingleh kyllut bad lyngngai jong ki sorkar kan ïalam sha ka jingjot ïa ki paid ha khappud la ki dei ki Karbi lane ki Pnar.
Na ka por sha ka por, ki nong Lapangap ki la ud la nam ïa ka jingwan leh beiñ ki Karbi ha ki pynthor ki hali da kaba pynjulor ïa ki jingthung jingtep lane da ka jingthombor ïa ki nongrep, hynrei ngim pat ïohi ïa ka sorkar Meghalaya ba kan shimkhia halor kane bad ban dawa na ka sorkar Assam bad ki bor ka West Karbi Anglong distrik ban kem ïa kita ki Karbi kiba wan pynkulmar shnong bad kiba kwah ban pynthut ïa ka shongsuk shongsaiñ. Dang ha u bnai Nailar la ïohi ïa ki pulit Meghalaya kiba la hap ban phet krad namar ka jingshah beh ha ki paid Karbi kiba la pyndonkam da ki maw bad ki jri siat sim. Ki nong Lapangap ki la kynnoh ba ka sorkar Assam ka la wan buh ïa ka ktem pulit ha ka jaka kaba dang hap hapoh u pud u sam jong ka shnong. Na ka liang kane ka shnong, ka la kyntu ïa ka sorkar Meghalaya ba kan wan buh da ka Battalion ha kane ka jaka khnang ban ïada ïa ki paidbah jong ka Lapangap khamtam kito kiba donkam ban leit rep leit riang namar ka jingshah pyndik ha ki paid Karbi. Ha ka jingshisha, ka sorkar Meghalaya ka la dei ban leh ïa kane namar ka Lapangap ka dang hap ha West Jaiñtia Hills lane ka la dei ban phah da ki pulit ban leit kem ïa kita ki Karbi kiba wan pynkulmar ïa ki paidbah. Ym dei ban ailad ïa kine ki nongwan pynthud ïa ka shongsuk shongsaiñ bad kiba kwah ban thaw jingeh ïa ki nongshong shnong.
Ha ka Dorbar Synrai ka Ïingdorbar Thawaiñ, u Myntri Rangbah u la pyntip ba na ka liang ka sorkar wat la kam shym la ïoh ka jingtip kaba bniah na ki pulit syntiat hynrei ka la pynkhlaiñ ïa ki bor pahara ha ki jaka khappud ka Meghalaya, Assam ha ka thaiñ Block-I hadien ba ka la don ka jingkynnoh ba la mih paw ka kynhun kieng atiar bathymmai jong ki jaitbynriew Karbi, kata ka United People’s Front of Karbi Longri (UPFKL). Haba pyntip ba ka sorkar Meghalaya bad Assam kin ïakynduh biang ha ka taïew kaba nyngkong ne ba ar jong u Risaw na ka bynta ka jingïakren, u Conrad u la ong ba kan don jingpynleit jingmut ba kyrpang ha kaba ïadei bad ka thaiñ Khanduli, Psiar, Block I bad Block II namar ki la don ki jingïakynad ba malu mala ha kine ki jaka. Hynrei ngi sngewdei ba ka sorkar u Conrad kan tuklar noh mardor halor ka Lapangap da kaba shim ïa baroh ki sienjam bakongsan khnang ban khanglad na ki jingjia kiba lah ban wanrah ïa ka jingduh jong ki mynsiem briew ba lui-lui.
