U Nongsaiñ Hima, 1969
Ka jingphohsniew bad jingmutdur jong u briew lyng-ba ki spah bad hajar snem mynshuwa ba un kynjoh ïa u Bnai, ka la kup bad wan urlong ha ka 21tarik u Naitung jong kane ka snem khadhyndai spah hynriew phew khyndai. Ka dei ka kam bah bakhraw tam ym tang jong kane ka pateng bynriew, hynrei lah ruh ban niew ba ka long ka kam kaba niar ba kiwei kiwei ki pateng ba la leit kin lah ban ïa nujor bad kano kano ka jingjop jong u khun bynriew.
U briew ha u Bnai, ka long ka khubor kaba satlak ka pyrthei ka ap – miet, ka ap – sngi, kaba naduh ba ka lieng Apollo – khadwei ka kiew na kaad haw haw Cape Kennedy haduh ba kan da wan phai pat ha duriaw bah Pacific, da ki phew million ngut ki briew ki shong syndah ha la ki television bad radio ban bud dien thik pa thik ïa kane ka jingleit. Ym ju don koit ka jingleit ka ban ioh ïa ki jingkyrkhu bad jingkitbok na jan baroh ki hima kiba pher jong ka pyrthei – ka jingleit kaba la pyntylli lut ïa ki jingmut jingpyrkhat bapher hapdeng u paid bynriew, kaba la pynklet ruh ïa ki jingiashun bad jingïaisih uwei ïa uwei ha kane ka sla pyrthei.
Ki lai ngut ki nongher haw haw ka America, ki la pynbna ba ki wan da ka jingsuk na ka bynta u paid bynriew bad ka la long ruh kumta. Hato kane ka juk kam la dei ban pyrkhat thymmai ba ki hima ki dei ban ïa syllok lang ha kum kine ki kam bakhraw, ha ka jaka ban pynlut kai ïa ka bor, ka por bad ka pisa ban ïa kieng wait kieng stieh bad ïa pynïap uwei ia uwei. Kane ka long ka jingkylli lehse ba ki Ri bapher ka pyrthei kin hap ban jubab kloi, lada ki thmu hok shisha ban bud dien ïa ki dienjat ba la iuh u briew ha u B ani. Ka jingleit sha u Bnai ka la long ka jingsdang jong ka juk haw haw, ha-dien ka jingprat lynti jong ka Russia bad America ban pynkhreh ïa kiei kiei mynta la kumba shiphew snem ei ei. Katto ka thong ngan nym long shuh sa tang sha u Bnai, hynrei ka thwei bah baïong jong ka haw haw ka bun hajar tylli ki dew lynnong kiba u briew u lah ban leit ban tip ïa ka maian ba ki buhrieh baroh shi katta. Ki met bneng Mars bad Venus ki long mynta ka jingangnud jong u briew ban tip shuh shuh ïa ki bad ïa kane ka jingpynkhreh ka lada sdang bad ïaid shakhmat.
Kam don namarkata ka jingkut ïa u briew ba un tip bniah ïa katei ka haw haw kaba sdien ki khlur, kaba long kaba phylla bad maian. Namar ba ka long kaba phylla bad maian mih ki jingkylli kiba dawa ïa u briew ba un jubab bad ha i bor iba rit, ong u, u briew u la pyrshang kyrdan pa kyrdan. Ka bor kaba khraw tam ha u briew ka long ka jingsngewrit bad ka jingngeit skhem ha ka jingsuk para briew bad ïa kiei kiei kiba haneng.Lehse u briew un nym lah ban poi sha ki pyrthei kiba don ha ki spah snem lynti, sha kiwei pat ki pyrthei kiba don sha ki pyrthei kiba don lyndet jong ka lyngwiar jong katei ka Mei – ngi, hynrei ka mynsiem bashlur jong u briew kaba u la pynpaw kan nym khang ïa kiei kiei kiba u lah ban kynjoh.
Ka jingjop ïa u Bnai, uba don ar lak san spah mer na kane ka pyrthei ka lah ban long tang ka jam kaba rit tam hakhmat ka jingkhang bah jong ka haw haw, hynrei ka long ruh ka jingryngkoh kaba khraw ba un poi sha kiwei kiei pat ki pyrthei kum ha u Mars, ka ban shimpor haduh 156 sngi lynti na kane ka pyrthei. U briew u la lah ban lait na ka bor jingtan ka pyrthei, bad ka dei ruh ka kamram jong uwei pa uwei ban lait na ki jingkhim pyrkhat bad jingkhim mynsiem jong ka pyrthei bad ban plie ïa la ki jingmut bad jingthmu sha ka jingïar bad jingkylluid jong ka haw haw, kaba la long ruh mynta, ka bynta jong ka pyrthei jong ngi.
