Mosul, Nailur:
Ha kane ka khubor la ong ba 100 ngut ki briew ki la khlad bad da ki spah ngut ruh kiba mynsaw hadien ka jingkem ding ka jaka khawai iathoh shongkurim hapoh ka thaiñ Shathei jong ka Iraq ha ka Sngi Ba-ar, ha kaba ki bor pyniaid ka Iraq ki la maham ba ka jingkhlad ki briew ka dang lah ban kiew shuh shuh namar ka jingbun jong kiba mynsaw ha katei ka jingjia. Katkum ka jingpeit thuh, la suba ba katei ka jingkem ding ka long na ki jingpynher ding ban pynitynnad bad ban rakhe ia katei ka jingiathoh shongkurim ki jaitbynriew Khristan ha katei ka sngi.
Kane ka la jia ha ka thaiñ Hamdaniya jong ka Nineveh, ha kaba bun na ki jingdon- jingem ha katei ka ‘hall’ ki la ingkhong bad um lut. Katkum ki dur ba la saphriang paidbah la iohi ia ki jingpynher bom ‘fireworks’ na katei ka jaka ha katei ka janmiet bad la ngeit ruh ba dei kane ka daw jong katei ka jingpluh.
