U Prof. Swell ha Delhi bad ka Hill State
Ha ka Dorbar Thaw Aiñ Dei hi kaba dang shu sdang mynta u bnai, u Prof. G. G. Swell M. P. u la kylli ïa u Home Minister, Lal Bahadur Shastri, (a) la ka long ne em kaba shisha ba da ka jingbthah jong u Myntri Rangbah, u Lat jong ka Assam u la ïa kynduh ïa ki Rangbah APHLC ha u Jylliew mynha kane; (b) la kata ka jingïakren ka la long ne em kaba seisoh; bad (c) ba kum ka jingmih na kata ka jingïakynduh u Lat u la phah ne em ki jingai jingmut bathikna ban ioh pyrkhat ka Sorkar kmie?
U Home Minister u la jubab kumne harum:-
(a)Ha kaba kut ka jingïakynduh bad u Myntri Rangbah ha ka 10 tarik u Jylliew 1963 ki Rangbah APHLC ki la kyrpad ïa u Myntri Rangbah ban don biang ki jingïakren. U Myntri Rangbah u la ai jingmut ba ki Rangbah APHLC kin da ïakynduh ïa u Lat, shwa ba kin ïakynduh biang ïa u.Kumta de, katto katne na ki Rangbah APHLC ki la ïakynduh ïa u Lat ha ka 18 tarik u Jylliew.
(b)Bad (c)Ki jingïakren hapdeng u Lat bad ki Rangbah APHLC ki la shu long ha ki rukon ban ïa wad lad. Ym pat da don jingai jingmut ba thikna ei ei, bad ka kam ka dang sah pyrkhat.
U Prof. Swell u la kylli ruh shaphang kaba thaw madan hiar Liengsuiñ ha Shillong, bad Deputy Minister Ahmed Mohiuddin u la ong ba la hap pyndam noh ïa kane ka kam na ka daw ka jingjur eh ka jinglut.
[U NONGSAIÑ HIMA (21 tarik Nailar, 1963)]
