Goris, Nailur:
Da ki hajar tam ki phetwir ki la mih noh na Nagorno-Karabakh ha ka Sngi Ba-ar hadien ka jingbthei jong ka jaka buh umphniang ha ka sngi ba la leit bad kaba la shim ia ka jingim jong 20 ngut ki briew ha katei ka jingjia.
Kumjuh na ka liang jong ka sorkar Armenia ruh ka la maham ba ka Azerbaijan ka lah ban pynher krad lut noh ia baroh ki phetwir kiba don ha katei ka jaka hadien ba ka la ioh knieh hi ia ka bor synshar ha katei ka ri.
Ka Armenia ha ka Sngi Ba-ar ka la pyntip ba ki don kumba 13,000 tam ki phetwir kiba la phet lypa naduh ba ka kynhun ba nyngkong jong ka Azerbaijan ka la leit poi ha ka Sngi U Blei.
Namar la ong ba katei ka bynta ba la ioh kurup noh da ka Azerbaijan ka la ktah jur bha ia ka shnong Goris, ha kaba bun na ki phetwir ki shong- ki sah ha katei ka bynta khappud.
Don bun ruh ki phetwir kiba la shu thiah sakma hapoh ki kali ha ki lynti- synkien ha ryngkat ki tum- ki tam bad ki jingdonkam jongki bad da ki laiñ kiba jrong ba ki ïeng habar ki dukan pynïoh ‘Sim Card’.
Watla katta, la ong ba ka Azerbaijan ka la kular ban ai ka jingshakri kaba bha bad ban nym leh shiliang ia baroh ki paidbah nongshong shnong jong ka Armenia ha kine ki sngi ban wan ba kan synshar hi noh.
Ka sorkar Armenia ka la iathuh ba 13 tylli ki metiap ki dei kiba dang lap na aktei ka jaka ba bthei ha ka Sngi Nyngkong bad 7 ngut pat kiba khlad hadien ka jingsumar namar ka jing mynsaw jur ba ki shah ktah ha katei ka jingjia.
Ha katei ka jingjia, la ong ba kumba 290 ngut ki la ngat bad mynsaw bad kiba dang shah sumar ruh hapoh ki jaka sumar bapher jong katei ka ri, ha kaba da ki ‘khat ngut kiba dang don hapdeng ka jingma namar ka jingmynsaw jur.
