Jowai, Nailur 27
Ka Chutwakhu ka la buh jaka ïalade sha ka final ha ka lympung ïalehkai 2nd Division Football Tournament na ka bynta ka 6th Debo Shullai Memorial Trophy ba pynïaid da ka West Jaiñtia District Sports Association (WJDSA).
Kane ka la wan urlong hadien ba ka lah pynliem noh ïa ka Lion da 1-0 kol ha ka jingïakhun semi final kaba long ha Kiang Nangbah Stadium ha ka sngi Balang.
Ïa kane ka shi kol ka Chutwakhu ka la thep ha ka minit 32 lyngba u Luckyness Khyriem. Ka Lion hadien ba ka la shah tam ka la pyrshang ban ïakhun tyngeh ban ïoh pynphai, hynrei ka la hap ban pdiang ïa ka nam rem namar haduh ba la kut ka por ialehkai kam shym la ïoh lad ban thep.
Ka semi-final kaba ar kan long hapdeng ka Shangpung Khliehmuchut pyrshah ïa ka Mooknor Thadmuthlong ha ka sngi Palei ha ka por 1:30 baje nohphai sngi.
