Shillong, Nailur 27
Ka kynhun ïalehkai U-19 ka ri India ka la lah pynthikna ban jam sha ka final ha ka SAFF U-19 Championship, hadien ba ka lah pynliem noh ïa ka Nepal lyngba ka tie-breaker da 3-2 kol ha ka sngi Balang.
Lyngba kane ka jingjop, ka India kan pynkhreh ban ïaknieh ïa ka nam lahduh pyrshah ïa ka Pakistan ha ka final ka ban long ha ka sngi Saitjaiñ. Kham hashwa ha kawei pat ka jingïakhun semi final, ka Pakistan ka la jop ïa ka Bhutan lyngba ka tie-breaker da 6-5 kol.
Haba phai sha kane ka jingïakhun semi final kaba la long ha Dasharath Stadium kaba ha Kathmandu, kine ki kynhun ki la pyrshang ban ïakhun tyngeh naduh kaba sdang. U rangapkol na Umroi (Ri Bhoi District), u Lionel Daryl Rymmei u la long tang marwei napdeng ki rangialehkai ka Jylla ban mihkhmat ha kane ka lympung bad u la lah ban ialehkai bha ban iashan tyngeh na ka bynta ka kynhun ialehkai ka ri bad khamtam eh ha kane ka jingiashut tie-breaker.
Ka India ka la ioh ban pynkhih jar nyngkong eh lyngba u Sahil Khurshid ha ka minit kaba 26. Hynrei ha ka kylla miet ka Nepal ka la lah ban pynphai kylla lyngba u Samir Tamang ha ka minit kaba 74 na ka bynta ban iakhaid mar shi kol haduh kaba kut jong ka jingialehkai.
Dei lyngba ka jingiashut tie-breaker ba ka India ka la lah ban kynjoh sha ka thong lyngba ka jinglah ban pynurlong ban thep kol da u Manglenthang Kipgen, Arjun Singh Oinam bad u Gwgwmsar Goyary.
Kumba ka paw ka India ka la lah ban ialehkai bha ha kane ka lympung. Ha ka jingialehkai group, ka India ka la lah ban pynliem ia ka Bangladesh bad ka Bhutan na ka bynta jam sha ka semi final bad iakynduh pyrshah ia ka Nepal kaba long ka kynhun kaba khlaiñ bor.
