Shillong, Nailur 28
Ka India ka la ïai bteng ban ïalehkai bha ha ka sngi kaba san jong ka Asian Games 2023 ha kaba ka la bteng ban khur biang sa lai tylli ki takma ha Hangzhou.
Ki nongsiat suloi kiba kynthup ïa u Sarabjot Singh, Arjun Singh Cheema bad u Shiva Narwal ki la lah ban khur ïa ka takma ksiar ha ka Men’s 10m Air Pistol Team event.
Ka India ka la khur biang sa ïa ka takma rupa na ka Wushu lyngba ka khlur ïalehkai kaba na Manipur, ka Roshibina Devi ha ka Women’s 60 kg final. U Anush Agarwalla u la khur ïa ka takma rnong kaba nyngkong eh ka jong u na ka bynta ka ri India ha ka jingïakop shong kulai kaba marwei ne ka individual dressage event.
Ha ka tennis, u Rohan Bopanna bad ka Rutuja Bhosale ki la jam sha ka semi final ha ka mixed doubles bad ki la thikna ban khur takma na ka bynta ka ri, kata u Ramkumar Ramanathan bad u Saketh Myneni ki la thikna ban khur ïa ka takma rupa ha ka men’s double hadien ba ki la jam ha ka final.
Ha ka Squash, ki kynhun ïalehkai jong ki shynrang bad kynthei ki la jam sha ka semi-final na ka bynta ban pynthikna ban khur takma ha baroh ar ki jingïakhun. Kumjuh ha ka jingialehkai Hockey jong ki shynrang, ka India ka la lah ban pynliem noh ïa ka Japan.
Haba phai sha ka phutbol ki shynrang, ka India ka la hap ban wanphai noh sha la ïing hadien ba ka la shah rem noh ha ka Saudi Arabia da 0-2 kol ha ka sngi Palei ha Hanglong Sports Centre Stadium.
Kane ka la wan urlong lyngba ki ar kol ba la thep da u Marram Mohammed ha ka kylla miet jong kane ka jingïakhun pre-quarter final.
Kumba ka long mynta ka India ka dangïai bat ïa ka kyrdan basan ha kaba ka la khur 25 tylli ki takma kiba kynthup ïa ka 6 ki takma ksiar, 8 ki takma rupa bad 11 ki takma rnong.
Ka China ka dangïai baat ïa ka kyrdan ba hakhlieh da kaba khur 155 tylli ki takma (83 ki ksiar, 47 ki rupa bad 25 ki rnong), ka Republic of Korea ka la wan ba-ar ha kaba ka la khur 76 tylli ki takma (20 ki ksiar, 20 ki rupa bad 36 ki rnong). Ïa ka kyrdan balai la bat da ka Japan kaba la khur 71 tylli ki takma (17 ki ksiar, 29 ki rupa bad 25 ki rnong. Ka Uzbekistan ka la wan basaw ha kaba ka la khur 31 tylli ki takma (6 ki ksiar, 10 ki rupa bad 15 ki rnong).
