Mairang, Nailur 28
U Myntri ka tnat ïalehkai jong ka Sorkar Jylla u Bah Shakliar Warjri u la kular ban pynïoh da ka stadium ia kaba yn shna ha kano kano ka jaka ha Kynshi kaba hap hapoh ka Mawthadraishan C&RD Block bad Eastern West Khasi Hills ia kaba yn sa pynbeit ïa ka jaka.
Ïa kane na ka liang u Myntri u la kren bad pynpaw haba ai jingkren kum u kongsan ha ka sngi plie pyrda ïa ka lympung ïalehkai phutbol ïa kaba la tip kum ka 3rd Knockout Football Tournament 2023 ïa kaba la pynlong da ka Kynshi Bangla Social & Cultural Sports Club ha ka sngi Palei ha madan Kynshi Bangla.
Shuh shuh u Bah Shakliar u la ong ruh ba hadien ba u la ïoh ban bat kum u Myntri ka tnat ïalehkai ha ki 6 bnai mynta u ïoh ka lad ban leit kylleng saw dong ka Jylla bad ha ki bun tylli ki District na ka bynta ki prokram bapher bapher. U la pynpaw da kaba u la ong, “Nga dap da ka jingkmen haba nga ïohi ba ki khun samla ka Jylla ki don ïa ka sap ka talen bad ka sap ka phong, hynrei lada ngi kwah ïa kata ka jingangnud bad lada phi don ïa kata ka sap ka jong phi kaba phi don la ha kano kano ka jingïalehkai, ngi dei ban don ka jingangnud bad trei shitom ban kiew shajrong”
U la ïathuh ruh ba ka sorkar lyngba ka tnat ïalehkai ha kine ki hynriew bnai shibun ki prokram ka la leh na ka bynta ka rynsan ban kyntiew ïa ki kam ïalehkai lane ïa ka sap ka phong bad ka sorkar ka buh ka jingkyrmen ba ha kawei ka sngi kin long ki nongïalehkai lane ki briew ki ban wanrah burom ïa ka Jylla bad ka sorkar ka don ïa ka jingangnud ba ki khun samla kin kiew ha ki jingim ka jong ki la ka long ha kano kano ka bynta ruh bad khamtam ha ka kam ïalehkai.
U la ong ruh ba kum u Myntri u don ka mynsiem ban ïatreilang ban nang pyrkhat kumno ban kyntiew ïa ki samla bad kumno yn kyntiew ïa ki kam ïalehkai kaba ki ieit, hynrei ka donkam ka jingïatreilang namar lada ong tang u Myntri u lah ban pynkiew katta ka long kaba bakla ka donkam ka jingïatreilang ki klob, ki sengsamla kumta terter bad lyngba kane yn sa lah ban kyntiew shajrong.
U la pynpaw ka jingkyrmen ba nangne shakhmat lehse ym tang na ka thaiñ Kynshi, hynrei ha ka Jylla hi baroh kawei yn sa ïohi ba bun ki samla kin nangkiew shajrong.
U la ong ruh ba kumba long mynta ka kam ïalehkai ka la dei kawei na ki lynti ba ki khun samla ki lah ban kamai ja bad kam dei shu tang kata kaba ngin ïalehkai sngewtynnad.
