Italy, Nailur:
U jumai ba 4.2 Magnitude u la pynkhynñiuh ia ka thaiñ Campi Flegrei jong ka Italy sha ka phang Mihngi jong ka Naples ha ka step jong ka Sngi Balang. La ong ba une u dei u jumai uba jur tam ha katei ka thaiñ hadien 40 snem.
Katei ka jingkhynñiuh ka la pynkhih win ia ki nongshong shnong jong katei ka thaiñ baroh kawei hynrei la ong ba ym shym la don pat kiba ngat ne mynsaw ne kino- kino ki jingjulor na utei u jumai ha katei ka step, la iathuh ka tnat Civil Protection Agency.
ka Campi Flegrei (Phlegraean Fields) ka long ka jaka lum ba ju mih ding, wat la ka la sangeh ban mih ding la bun snem.
Utei u jumai u la khynñiuh ha ka por kumba 3:35 mynstep bad la lah ban ïohsngew ruh ha ka thaiñ Naples baroh kawei.
La ong ba une u long u jumai uba heh bad ba jur tam ba katei ka thaiñ kam ju ioh mad shuh mynta la 40 snem. Kumta ruh la maham ba lah ban don biang sa kiwei pat ki jingkhñiuh ha ki por ki ban wan.
U Josi Gerardo Della Ragione, u heh jong ka Bacoli, u la iathuh ba utei u jumai ha katei ka step u la pynsyier ia ki paidbah nongshong shnong jong katei ka ri namar kim pat ju ioh mad ia u jumai uba jur la 40 snem mynta.
Ki heh jong katei ka thaiñ ki la kyntu ia ki paidbah ba kin ym khuslai ne sheptieng eiei namar baroh shi katta ruh ki la sah bad im ha katei ka bynta kaba long them bad kaba la kylla shnong briew hadien ba la bthei ki lum mih ding ha ki phew snem mynshwa. Kumta ruh ki la kyntu ia ki paidbah ba kin long kiba jai-jai bad kan ym don kano- kano ruh ka jingma ia kiba shong ha katei ka jaka.
