New Delhi, Nailur:
Katkum ki khubor la ong ba ia u Myntri Rangbahduh barim jong ka Pakistan- u Imran Khan, uba la shah kem halor ki kam bam sap, ha ka Sngi Ba-ar pat la pynkynriah noh ia u na ka patok Attock Jail sha ka Adiala Jail kaba don ha Rawalpindi. Ha katei ka sngi la pahara ruh da ki kali pulit kiba la leit buh ia u sha ka patok ha Rawalpindi kaba don kumba 100 km na Attock. Ka Adiala Jail pat ka don tang kumba 30 km eiei na ka nongbah Islamabad.
Ha katei ka sngi, la iohi ia ki paidbah kiba la ialum bad ïeng narud ki surok ba la kit ia utei u nongialam ban leit buh ia u sha katei ka patok ha katei ka miet. Ki pulit kiba ap pahara ha kitei ki kali ruh ki dei kiba la sop bad da bha ialade da ki jingda shadem kiba skhem namar ka jingbym shngaiñ ioh don kano- kano ka jingjia kaba ap ia ki hapdeng ka jingiaid lynti jongki ha katei ka miet.
Kane ka khubor ka long ruh hadien ba ka Islamabad High Court ka la bthah ia ki heh ka Pakistan ba kin pynkynriah noh ia utei u Myntri Rangbahduh barim jong ka ri sha kiwei pat ki patok kiba kham shngaiñ bad kham khlaiñ ka jingiada ban ia ka Attock Jail ba la pynshong ia u naduh ka por ba la kem ia u ha ka 5 tarik u Nailar haba iadei bad ka jingjia ha Toshakhana.
