Philadelphia, Nailur:
Katkum ki khubor la ong ba ha ka Sngi Nyngkong ki bor pyniaid ki la lap ia ka met jong kawei longkmie kaba la don 66 snem ka rta kaba trei kum ka nongshim kyrteng ha ka tnat liengsuiñ jong ka America hapoh Philadelphia Airport. Ia ka met iap jong katei ka longkmie la lap napoh ka kamra ïing basa jong katei ka kad liengsuiñ.
Ia kane ka jingjia la lap da ki nongpynkhuid jong katei ka jaka ha ka por kumba 10:45 jong katei ka miet Sngi Nyngkong bad ka kynhun wad bniah ka la pyntip ba katei ka longkmie ka la khlad lypa naduh ka por ba shem ia ka na katei ka kamra ha ryngkat ka jaiñ ba la set na ka shyntur.
Ki heh jong katei ka kad liengsuiñ ruh ha ka Sngi Ba-ar, ki la pyntikna ba katei ka longkmie ka dei ka nongtrei jong katei ka kad liengsuiñ. Wat la katta, ia ki jingtip bad ka kyrteng jong katei ka longkmie ym pat shym la pynpaw pyrthei tad haduh mynta.
Katkum ka jingshem jong ka kynhun wad bniah, la ong ba ia ka met jong katei ka longkmie la shem hadien kumba 2 sngi eiei naduh ba ka la jah rngai bad sahkut hapoh jong katei ka kamra. Hynrei ym lah pat ban sngewthuh ba balei kitei ki para ba iatrei lang kim shym leit rung ne wad ia katei ka briew wat hadien ba ka la jah da ki bun kynta.
Hynrei, kaba lyng-ngoh ka long ba ym shym la iohi dak ne paw dak eiei ba katei ka longkmie ka lah ban shah thombor ne shah pyniap bad la shem tang ia katto katne ki slip bad ki dawai ha katei ka kamra thiah jongka.
U heh pulit ka Philadelphia u la ong ba ka jingiap jong katei ka briew ka long kaba kyndit bad kaba sngew lyng-ngoh ruh bad kumta ka tnat pulit kan ialeh ban wad bniah khlem da pynslem ban lap ia ka daw jong ka jingiap jongka ha katei ka ïing basa.
Ia ka met jong ka la rah noh sha ka shlem treikam jong ka Philadelphia Medical Examiner bad dang ap ruh ban ioh ia ka kaiphod jong ka Post-mortem. Tat haduh mynta, ki pulit kim pat ioh kem ïano- ïano ruh namar kim pat lap ia ka jingdon kti jongno-jongno ha katei ka kam bad kumta ki dang ialeh ban tih bniah bad ban tohkit bniah ruh lyngba jong kitei ki dkhot baroh kiba trei ha katei ka hotel bad kumjuh ruh ha katei ka Kad Liengsuiñ hi baroh kawei.
Katei ka briew ka dei kaba la trei ha katei ka Kad Liengsuiñ la 25 snem mynta.
Ha u Jylliew jong une hi u snem, kawei ka nongtrei ba la trei slem bha ha katei ka Kad Liengsuiñ ka la kyllon ha shiteng lynti ba la her ka liengsuiñ na Venice sha Philadelphia. Ia kane ka briew la ithuh kum ka Carol Wright, kaba la trei ha katei ka Kad Liengsuiñ haduh 38 snem hynrei ha katei ka sngi ka sngi ka la shu kyllon khlem tip briew shuh bad ka la khlad noh ruh tang hadien ba la rah ia ka sha jaka sumar.
