Mairang, Nailur 28
Ka Kynshi Bangla Social & Cultural Sports Club ha ka sngi Palei ka la plie pyrda ïa ka lympung ïalehkai phutbol ba la tip kum ka 3rd Knockout Football Tournament 2023 ha madan Kynshi Bangla, Eastern West Khasi Hills ha kaba ka kynhun ïalehkai jong ka Chan Shaphrang FC ka la ïoh ban khur ïa ka jingjop.
Ka nam tam jong ka Chan Shaphrang FC ka la wan hadien ba ka la ban pynliem ïa ka Mawsynrap FC da 3-2 kol bad u Donlad Diengdoh na ka Chan Shaphang FC u la khur ïa ka nam Man of the Match.
Ha kane ka sngi plie u Myntri ka tnad ïalehkai ka Sorkar Jylla u Bah Shakliar Warjri u la long u kongsan ha kaba la ïadon lang ruh u Deputy Commissioner ka Eastern West Khasi Hills u Bah G. Kharmawphlang, u DSP ka Eastern West Khasi Hills , u BDO ka Mawthadraishan Block, ki nongkitkam ka Kynshi Bangla, ki riew rangbah bad kiwei kiwei .
Shuh shuh ïa katei ka sngi la pynshit pynshngaiñ ruh da ki prokram bapher bapher kum ki jingrwai , bad ki drill na ki skul bapher bapher jong ka thaiñ Kynshi, bad ha kane ka sngi na ka liang ka Kynshi Bangla ka la ïoh ruh ban aiti ïa ka dorkhas sha u Myntri kumjuh ruh ïa ka jingai sngewbha sha u, nangta ïa DC bad kiwei kiwei ki ophisar kiba ïadon ryngkat, kumjuh ruh sha ka kynhun tem tynrai ka KYRSU Cultural Central , sha ka samla Rida Lyngdoh Nonglait kawei na ki nongrwai na ka thaiñ Kynshi.
Na ka liang ka Kynshi Bangla ka la pyntip ruh ba ka jingïalehkai jong kane ka lympung kan bteng biang ha ka 6 tarik u Risaw hapdeng ka Meghalaya Police F.T pyrshah ia ka Lowingwell S ha ka por 2:30 janmiet, katba ha ka lympung ïalehkai kaba 50 hajar tyngka ka Rashan SC kan ïakhun pyrshah ïa ka Myriaw SC ha ka por 12 baje mynsngi.
