U Nongsaiñ Hima, 1990
La jan baroh ki Ri bakhraw ka pyrthei kiba la kiew ha ka ioh ka kot ka saians bad technology, ki sdang shuwa ban pynkhraw iaka rep ka riang. Lada shim nuksa kiba biang ka pyrthei ka ioh jingmut naka jingkiew ha ka bor bad burom jong ka Amerika kaba lah nyngkong eh ban pynbiang ka rep ban pyndap bam iaki paidbah jong ka lyngba ka rukom sam iaki jaka rep (land Distribution).
Ka jingpynbiang iaki nongrep iaki jingdonkam katkum ka jingiaid ka por bad ka jingpynshlur ban pynmih ia ki mar rep kiba iaid iew. Ka long kaba shisha ba ka bam ka dei kaba donkam eh ia baroh khnang ba ki paidbah kin lah ban pynroi ialade ha kiwei pat ki bynta, kaba donkam ha ka imlang sahlang.
Don kiba ong ba ki nongrep ki dei ka mluh jong ka pyrthei, kane ka jingong ka don ka jingshisha namar, khlem ki nongrep kiba smat ban pymih iaki jaid jing-thung ba bun jaid ka kmie kaba leit siew ha iew ha hat kan shem shitom ban pynbiang hala iing ia ki jaid jingbam kiba tei ia ka met briew. Naduh ba dang khynnah donkam iaki jingbam ba tei khnang ba ka jabieng kan long kaba proh. Lada shu ong ka biang, hynrei, bunsien ngi klet ia kito kiba pynmih iaka syep ka syar, ka buit ka bor ban pynbiang iaki jhur ha iew na ka bynta u paidbah. Hynrei bunsien ki nongrep ki ju shah khniot ha ka dor ka mur bad kumjuh ruh u nongthied u ud ia ka jing-rem ka dor ka mur haba leit siew ha iew.
Ka donkam namarkata, ka jingiatrei lang ban pynim iaki nongrep khnang ba kin ioh mynsiem ban pynkhlain iaka rep bad ba kin nang pyniar iaka sha kiwei pat ki bynta jong ka rukom rep bad bunjaid ki jait jingthung. Kumjuh ki nongkhaii ki dei ban sngewthuh ba ka jing-iohnong jong ki kam dei ban ktah ia u paidbah, namar, ka jinglah u paidbah ban siew ha iew ka long ka lynti ka jingroi lang baroh ym ba kan don ka jingmyntoi tang ha ka shimet lane, tang ha ki khyndiat ngut.
Hapdeng ba ong ba donkam ban pynieng ia ka rep ka polisi jong ka sorkar ruh ka dei ban long kaba biang na ka bynta ki nongrep ym ban shu shna ia ki skim bad plan ki bym ia dei bad ki bad ka bym lah ban pyntreikam. Katno la lehnohei ka tyngka sorkar haba jia kumne. Wat katta ruh ki don ki skim kiba biang ia ki paid nongrep hynrei tang khyndiat ngut kiba ioh ban shim kabu iaki, na kano ma kano ka daw.
La ka bor ban rai halor ka rep ka riang dei ban don ki riew shemphang halor jong ka ki ban leh ia kata kaba donkam ym ban aiti ia ka rai treikam ha ki briew ki bym pat ju ktah ia ka rep mynno mynno ruh. Ki lait ki let namarba bym don jingtip kiba biang shaphang ki jaka rep ka ktah mynno ruh. Ki lait ki let namarba bym don jingtip kiba biang shaphang ki jaka rep ka ktah shibun iaka ioh ka kot ki nongrep. Ym tang mynta ka ktah ruh ia ka jinglong ka khyndew ka mariang. Namarkata, ban pynieng iaka rep ka donkam ka jingsngewthuh kaba jngai ia ki jingdonkam baroh khnang, ba ki jingpyrshang kin nym long lehnohei. Une u dei mawjam banyngkong ba ka Ri jongngi kan kiew ha ka ioh ka kot bad ka ban pynlah ba ngin beh sha ka kyrdan jong ki Ri na Sepngi.
