London, Nailur:
Ki pulit ka London ha ka Sngi Balang ki la iathuh ba ki la ioh ban kem noh ia uwei u khynnah hadien ba u la dep ban dung iap ia kawei ka khynnah 15 snem katba ka dang don ha lynti ban leit sha skul ha katei ka sngi. Kane ka jingjia ka la wanrah jingsyier ia ki paidbah nongshong shnong ka Britaiñ namar ka jingjur jong ki jingjia dun tari bad jingpyniap hapoh katei ka ri ha kine ki sngi.
Ha katei ka sngi, ki paidbah kiba sakhi ia katei ka jingjia ki la pyntip mar-mar sha ki bor pyniaid bad ka kali kit nongpang ruh ka la wan poi bran-bran sha katei ka jaka kaba don hapoh Croydon jong ka thaiñ Shathie ha London, ha ka por kumba 8:30 mynstep.
Wat la ki nongsumar bad ki briew jong ka tnat iarap ki la ialeh ban pynim ia katei ka khynnah, hynrei la ong ba tang hadien 50 minit jong katei ka jingjia, katei ka khynnah ruh ka la khlad noh.
Haba iadei bad kane, ki pulit ki la ioh kem noh ia uwei u khynnah 17 snem uba la suba don kti ha katei ka jingjia.
U heh ka London, u Sadiq Khan u la pynpaw ia ka jingsngew khia kaba jur halor ka jing jur jong kine ki jingjia pyniap hapoh ka ri bad u la kular ruh ba un iakhun katba lah ban tehlakam bad ban ratdyngkhong noh ia kum kine ki jingjia hapoh ka ri.
