Shillong, Nailur 28
Ki lai ngut ki rangïakura ka Jylla ki la wanphai sha la ïing hadien ba ki la lah ban pynpaw ia ka jingtbit ha ka rynsan ïakura jong ka Professional Boxing ba la pynlong da ka Vadodara Combat Academy kaba hap hapoh ka jingkhmih jong ka Indian Boxing Council ha ka Sngi U Blei ha Gujarat.
Kine ki kynthup ïa u Shanborlang Marbaniang uba la lah ban pynliem ïa u Anakapalli Madanpratap na Andhra Pradesh lyngba ka knockout ha ka wat ba lai jong ka kyrdan ïakura Super Fly Weight 52kg. Kumjuh u Ïarapborsing Kharbani uba la lah ban pynliem noh ïa u rangïakura na Telangana u Devavath Anil Kumar ha ka kyrdan ïakura jong ka Bantam-weight 53.5kg lem bad u Elbin Rani uba la shah rem ha u Salim Khan na Haryana ha ka kyrdan ïakura jong ka Feather-weight 57kg.
Ïa kine ki rangïakura la pdiang burom ha ka sngi Palei ha Umsning, Ri Bhoi District da ka Meghalaya Professional Boxing Council (MPBC) ryngkat ka Khasi Students’ Union (KSU Sengkmie, kumjuh na Upper Shillong bad Umsning Circle, kiba ha ïing hasem bad kiwei.
Na ka liang ka kmie jong u Shanborlang ka Kong Siplinda Marbaniang ka la pynpaw ïa ka jingkmen eh halor kane ka jingjop ha ka sien kaba ar ha ka Professional Boxing. “Haba nga peit ïa ka video kaba la saphriang kylleng ïa ka jingïalehkai u Shanbor, ngam lah khlem da jaw ummat namar ka dei shisha ka jingangnud ka jong u ban ïai kiew shaphrang ha ka kam ïakura. Ngam shym poi pyrkhat ba kumno u lah ban ïalehkai haduh katto namar u rangïakura ka liang pyrshah u long uba khlaiñ, hynrei kumba pynpaw kito ki nongkynthoh (comment) ba u sonmynken khnai u long uba sat, hynrei wat ïalehkai. Nga shu kyrmen ba kane ka dei ka sap ba ai U Blei, hynrei ngi kum ki briew ngim sngew lah ban mutdur.”
Ka Kong Siplinda ka la pynpaw ka jingsngew diaw mynsiem namar na ka liang ka Sorkar Jylla kam shym la plie lad na ka bynta ki khynnah kiba don ïa kum kine ki sap ïalehkai. “Halor ki jinglut jingsep ha kaba leit ïalehkai, kum ka kmie nga la hap ban kyrshan na ka bynta la u jong u khun namar u angnud shisha ban ïai bteng ha ka kam ïalehkai. Watla katta nga sngewnguh ia kito kiba la ïarap lang kat kaba ki lah bor na ka bynta jong u,” ka la bynrap.
Ha kawei pat ka liang u Asst. Organising ka seng KSU Sengkmie u samla Hopefulborn L. Mawnai u la pynpaw ia ka jingsngew sarong ba kine ki rangïakura jong ka jaitbynriew Khasi ki la lah ban pynpaw ïa ka jingtbit ha katei ka rynsan ïakura. “Nangïai trei shitom nangne shakhmat bad kiar na ki jingmlien kiba sniew, nga ngeit ba phin nangïai bteng ban khur jingjop ha kiwei pat ki rynsan ïakura ki ban dangwan.”
Kumjuh u General Secretary ka MPBC u Kampherki Thangkhiew u la ai khublei ïa kine ki rangïakura ba ki la lah ban khur ïa ka jingjop. “Nga kyrmen ba phin dangïai trei shitom nangne shakhmat namar kin dangbun ki jingïakhun ki ban dangwan kiba phi dangdonkam ban pynkhreh.”
Kat kum ka jingïathuh da ki bor pynïaid ka MPBC, la ong ba na ka liang ka Indian Boxing Council ka la thmu ban plie lad ïa u Shanborlang ba un leit ïakhun sa sha ka rynsan ïakura jong ka World Boxing Council, hynrei kane kan shong tang lada u ïoh ki lad jingïarap ne ki nongkyrshan na ka bynta jong u namar ka jinglut jingsep ka long kaba bun.
Katba u Ïarapborsing un leit ïashim bynta biang ha ka 10 tarik u Risaw mynta u snem ha ka nongbah Delhi na ka bynta ka wat kaba hynriew jong katei ka kyrdan ïakura.
