Shillong, Nailur 29
Ka India ka la kynjoh sha ka kyrdan basaw ha ka Asian Games 2023 hadien ba ka la ïai bteng ban ïalehkai bha ha ka sngi kaba hynriew jong kane ka lympung ha kaba ka Palak Gulia bad ka Esha Singh ki la lah ban khur ïa ka takma ksiar bad rupa ha ka jingïakop siat suloi para marwei jong ka 10m air pistol, ha ka sngi Thoh-dieng ha Hangzhou kaba ha China.
U Aishwary Pratap Singh Tomar, Swapnil Kusale, Akhil Sheoran ki la khur ïa ka takma ksiar ha ka Men’s 50m Rifle 3P Team bad ki la lah ban pynpra ïa ka rekod ha ka pyrthei.
Kham hashwa ka Esha, Palak bad ka Divya Thadigol ki la khur ïa ka takma ksiar kaba nyng-kong bad ki la khur ruh ia ka takma rupa ha ka Women’s 10m Air Pistol Team.
Hadien ki nongïaleh-kai siat suloi, ka India ka la khur takma ruh sa na ka squash, athletics bad tennis. Ka Kiran Baliyan ka la khur ïa ka takma rnong ha ka shot put jong ki kynthei bad kane ka dei ka takma kaba nyngkong na ka athletics, kumjuh ha ka Tennis u Saketh Myneni bad u Ramkumar Ramana -than ki la khur ïa ka takma rupa hadien ba ki la shah rem noh ha ka final. Katba u Rohan Bopanna bad ka Rutuja Bhosale ki la jam sha ka final ha ka mixed doubles.
Ka India ka la thikna ruh ban khur takma na ka squash ha kaba kan pynkhreh ban ïakhun final pyrshah ïa ka Pakistan ha ka kynhun jong ki shynrang.
Ha ka jingïalehkai Hockey jong ki shynrang, ka India ha ka sngi Palei ka la pynliem noh ïa ka Japan da 4-2 kol ha ka jingïakhun kaba lai jong ka Pool-A. Ia kine la thep da u Abhishek (13?, 48?), Mandeep Singh (24?), bad u Amit Rohidas (34?), katba na ka Japan la thep da u Genki Mitani (57?), bad u Ryosei Kato (60?).
Haduh ka janmiet jong ka sngi Thohdieng, ka India ka la khur 33 tylli ki takma, kaba kynthup ïa 8 tylli ki takma ksiar, 12 tylli ki takma rupa bad 13 tylli ki takma rnong.
Te kumta ka China ka dangïai bat ïa ka kyrdan ba nyngkong ha kaba ka la khur haduh 200 tylli ki takma. Ka Japan ka la jam sha ka kyrdan ba-ar da kaba kamai 99 tylli ki takma, kata ka Republic of Korea ka la hiar noh sha ka kyrdan balai bad kamai 102 ki takma.
