Shillong, Nailur 29
U Working President ka Meghalaya State Olympic Association (MSOA) u Bah John F. Kharshiing u la pynpaw ba ka synjuk kan ïaleh ban pynïaryngkat kyrdan ïa ka Sohra Marathon kum ka Boston Marathon.
Haba ïakren bad ki lad pathai khubor ha ka sngi Thohdieng, u Bah John uba long u Co-Chairman ka 2nd Sohra International Half Marathon 2023 ha ryngkat ka jingïadon lang u G. Krishnan, Chief Technical Officer ka Athletics Federation of India, u la pynbna ba la dep ban pynbiang ïa baroh ki jingdonkam na ka bynta ki nongïashim bynta ha kane ka jingïakop ka ban long ha ka step phyrngab jong ka sngi Saitjaiñ ha Sohra.
Kane ka jingïakop kan sdang naduh Laitsohpliah sha Sohra haduh Mawsmai ha kaba ki la don kumba 3000 hajar ngut ki nongïa-shim bynta ha ka 21k, 10k bad Run For Fun 5k.
Watla kane ka jingïakop ka dangdei ka sien kaba ar ba la pynlong ha Sohra, hynrei utei u nongïalam ka MSOA u la khmih lynti ban ïai bteng ban pynlong ïa kane ka marathon manla u snem. “Ngi khmih lynti ban pynïaryngkat ïa kane ka marathon kum ka Boston Marathon, kaba la ju pynlong ïa kane ka jingïakop mynta la bun snem. Te kumta ngi kum ki dkhot ka synjuk ngin ïaleh katba lah ban pynurlong manla u snem,” u la ong Bah Kharshiing.
Ha kane ka jingïakop ki don 300 ngut ki nongïashim bynta ha ka 21k, kynthup ïa 6 ngut ki nongmareh kiba na Kenya. Kine ki long u Elkana Kipkoech Runo, Richard Kiprop bad u Elijah Kipruto Kemei, katba ha ka liang ki kynthei ki long ka Lilian Rutto, Agnes Mueni Mutua bad Susan Chebet. Ha ka 10k ki don 545 ngut, ha ka 5k ki don kumba 2000 ngut.
“Watla ha u snem ba la lah ki la don tang 700 ngut ki nongïashim bynta, hynrei sngi sngewkmen ba ha kane ka sien kaba ar ki la nangkiew ha ka jingdon ki nongïashim bynta kiba la don kumba 3000 ngut.”
“Ngi pynshlur ïa ki khynnah ba kin ïashim bynta ha kane ka jingïakop khnang ba kin ïoh ïa ka met kaba koit ba khiah bad kaba ar ka long ba kin sngewthuh halor kane ka jingïalehkai ba kin nangjam shaphrang ha ka kam ïalehkai. Hynrei ha kawei pat ka liang kan ïarap ruh ban kyntiew ïa ki kam jongohkai,” la ong u Bah John.
Ha kawei pat ka liang u Krishnan u la ong ba ka long kaba donkam ban pynbha ïa ki lynti ki surok khnang ban kyntiew ïa kum kine ki jingïakop mareh marathon ha ki snem ki ban nangwan.
