Mairang, Nailur 29
Ka shlem treikam jong ka District Swacch Bharat Mission, Eastern West Khasi Hills District ha ryngkat ka jingïatreilang bad ka tnad Public Health Engineering (PHE) Mairang ha ka step jong ka sngi Thohdieng ka la pynlong ïa ka jingïakop mareh marathon na ka bynta ki samla shynrang bad kynthei kiba shong ba sah hapoh u pud u sam jong katei ka district.
Ïa kane ka jingïakop mareh marathon la pynlong kum shi bynta ban rakhe ïa ka Swachha hi seva 2023, bad la tip kyrteng ïa kane ka jingïakop mareh kum ka Swacchta Run Competition kaba dei halor ka phang ‘Garbage Free India’.
Ïa kane ka jingïakob la sdang naduh ka por 7 baje mynstep nakhmat khyrdop ka shlem treikam jong u DC ha Mawsawa bad la pynkut noh ha ka phyllaw ka sshlem treikam jong ka tnad PHE Mairang ha ka jingjngai kaba long 14 km.
Ha kane ka jingïakob mareh la wan ïashim bynta da ki spah ngut ki samla kiba kynthup lang ïa ki kynthei bad shynrang na kane ka thaiñ. Ïa ka kyrdan kaba nyngkong na ki shynrang la rah da u samla Wanbok L. Maw-phlang, ïa ka kyrdan ba-ar la ïoh da u samla Wan-kyrmen L. Mawphlang bad ïa ka kyrdan kaba lai la ïoh da u samla Dapku-par Rapsang. Katba ïa ka kyrdan ba nyngkong ha ka liang ki kynthei la rah da ka samla Ibashongkun Kurbah, ba-ar ka samla Nerisa Nongrum bad ïa ka kyrdan balai la ïoh da ka samla Lanosha Marweiñ.
Kitei ki nongjop ki la ïohpdiang ïa ki khusnam pisa kiba T. 5000, T. 3000 bad T. 1500 ïa kiba wan ha ka kyrdan ba nyngkong, ba-ar bad balai.
