Ka jingïakren Hill State ha Delhi
Ki 6 ngut ki Rangbah APHLC ba la leit Delhi, ki la shong ïa kren bad u Prime Minister Nehru ha ka 4 bad 5tarik. Katkum ba la paw ha ki kot khubor, lada ki jingïakren kiba jur shibun hapdeng u Prime Minister bad kitei ki Rangbah. Ha ki jingïakren, u Prime Minister u la pynshai ba ki Riewlum ki lah ban ioh kata ka synshar hi kaba pura (cent per cent auto-nomy)kumne harum:-
(1)Yn don uwei ar ki Minister Riewlum, bad ïa kine dei ban thung kat kum ka jingkubur (recommendation) jong ki M.L.A Riewlum, ki ban dei khmih ïa ka jingpynïaid kam ha Ri Lum.
(2)Kan don ka bynta ba kyrpang jong ka Secretariat ka ban kynthup ïa baroh ki ophis (departments) ba ïadei bad ka jingpynïaid kam bad ka jingpynroi (development) ïa ki Ri-Lum.
(3)Ki Riewlum kin jied hi ïa ka ktien jingpynïaid kam katba ki sngewbit.
(4)Kan don ka jingbhah (allocation) ba kyrpang ïa ki pisa tyngka ba ïadei bad ka jingpynïaid kam ïa ki riewlum bad ki M.L.A Riewlum hi kin peit bad pyndonkam ïa kita ki pisa.
(5)Kan don ka Komiti jong ki M.L.A Riewlum, ka ban don ka bor ban mynjur ne ban nym mynjur ïa kano kano ka aiñ ba ïadei bad ki Ri-Lum bad kin don ruh ïa ka bor ban tyrwa kano kano ka aiñ ba ïadei bad ki Ri-Lum bad kumjuh.
Kitei ki 6ngut kila pynsngewthuh ïa u Prime Minister ba kin sa buh ïa kine kiei kiei baroh hapoh ka jingpyrkhat jong ka APHL Conference.
U Prime Minister ula mynjur ruh ban pyrkhat ïa ka jingdawa jong ki Rangbah Riewlum ban kham pynbun ngut ïa ki M.L.A bad 30 ngut ki M.L.A, ha ka jaka tang uwei u M.P bad 15 kumba ka long mynta.
[U NONGSAIÑ HIMA (9 tarik Risaw, 1963)]
