Shillong, Nailur 29
Ka East Garo Hills District Cricket Association ka la pynliem noh ïa ka Shillong Cricket Association ‘A’ da 18 run na ka bynta ban jam sha ka final ha ka U-19 Boys Inter District Cricket Tournament ba la pynïaid da ka Meghalaya Cricket Association ha ka sngi Thohdieng ha Salpara, Mendipathar.
Kane ka kynhun kan ïaknieh ïa ka nam lahduh mynta ka sngi Saitjaiñ pyrshah ïa ka Tura DCA, kaba la jop ïa ka West Jaiñtia Hills DCA ha ka semi final kaba nyngkong kaba la long ha ka sngi Palei.
U Ayushman Rabha u la lah ban khur 4 wiket ha ki 8 over ha kaba ka la pynlong ïa ka SCA-A ban pynkhyllem ïa ki nongtied ka EGH na ka bynta ban kamai tang 79 run ha ki 28.2 overs. U Lensbirth N. Marak u la long u nongtied uba la ïoh bun da kaba kamai 35 run. Une u nongtied u la long u nongtied uba ar ha kane ka lympung da kaba kamai 154 run.
Kiwei pat ki nongkawang bol la SCA ki long u Charm Marbaniang (3/12 ha ki 7 over) bad u Angkit Tamang (2/12 ha ki 4.2 overs).
Haba wan shimti ïa ka pali kaba ar ki nongtied ka SCA-A ki la shem jingeh ha ka ban tied ha kaba ki la shah pynkhyllem uwei hadien uwei na ka bynta ban kamai tang 61 run ha ki 23.1 over.
Kane ka la wan lyngba ka jingïalehkai bha ki nongkawang bol ka EGH kiba kynthup ïa u Bilgrak G. Sangma (3/7 ha ki 6.1 over), Jeristho R. Marak (3/9 ha ki 4 over) bad u Gulgul Sangma (2/20 ha ki 8 over). Napdeng ki nongtied ka SCA, dei tang u Angkit uba la lah ban kamai 12 run.
