Jowai, Nailur 29
Ka Mukhla FC ka la jam sha ka final jong ka lympung ïalehkai (L) Kesilroy Pala Invitation Football Tournament 2023 ba la pynïaid da ka West Jaiñtia District Sports Association (WJHDA).
Kane ka la wan hadien ba ka Mukhla FC ka la pynliem noh ïa ka CSA United da 2-0 kol ha ka jingïakhun semi-final kaba nyngkong kaba la long ha Kiang Nangbah Stadium Ladthadlaboh, Jowai ha ka sngi Thohdieng.
Watla kine ki kynhun kim shym la lah ban thep kol ha ka kylla step, hynrei dei ha ka kylla miet ba ka Mukhla ka la ïoh ban thep kol nyngkong lyngba u Teddy Bang ha ka minit kaba 64 bad ïa ka kol laba ar la pynbud da u Wadajied Ryngkhlem ha ka minit kaba 90+1 na ka bynta ban khur syndon ïa ka jingjop.
Ka jingïakhun semi final kaba ar kan long mynta ka sngi Saitjaiñ hapdeng ka Rymbai Shken Shynriah pyrshah ïa ka Salaroh FC ha ka por 2 baje nohphai sngi.
