Shillong, Nailur 29
Ka Meghalaya High Court ha ka Sngi Thohdieng ka la ai jamin ïa kawei ka kynthei kaba shah set patok bad kaba don ïa u khñiang jingpang HIV khnang ba ka lah ban ïoh jingsumar.
Mynta ka sngi, ka ïingbishar ka la ïoh peit ïa ka kaiphod halor ka jinglong jingman ka jingkoit jingkhiah jong kata ka kynthei. Ka ïingbishar ka la pynpaw ba ym don jingartatien satia ba kata ka briew ka don ïa u khñiang jingpang HIV bad ka la shah sumar ruh.
Nalorkata, ka la ong ba ym don jingartatien satia ba ki bor ba dei peit jong ka patok kaba katei ka kynthei ka la shah set ki la leh ïa kaba bha tam ban khmih ïa ka koit ka khiah jong kane ka kynthei. Ha kajuh ka por, ka ïingbishar ka la ong ba kito kiba don ïa kane ka jingpang ym tang ba ki shitom ha ka met, hynrei ka don ruh ka jingktah ha ka jingmut jingpyrkhat.
Ka ïingbishar ka la pynkynmaw ïa ka rai jong ka Supreme Court ha kawei ka mukotduma ha kaba la ai jamin ïa uwei u briew na ka daw ba u la don ïa u khñiang jingpang HIV.
Kumba la kdew haneng, ka long kaba shisha ba katei ka briew ka don ïa u khñiang jingpang HIV, bad namarkata, ka ïingbishar ka la ai ïa ka jingpyrkhat bakyrpang ïa ka khnang ba kan ïoh ïa ka jingsumar kaba biang lane ban ïoh shong ïoh sah ha ka jaka kaba ka sngew biang.
Hynrei ka ïingbishar ka la ong ba ka jingai jamin kam dei satia ban pynkut noh ïa ka kam, hynrei ka dei tang ban pynthikna ba katei ka briew kan ym phet rieh. Lada kane ka briew ka ai ïa ka jingïatreilang bad ki bor tohkit bad ha ka por ba bishar, yn lah ban pyndep ïa ka thong jong ka jingïaid ka jingbishar.
Namarkata, ka High Court ka la pdiang ïa ka jingpan jamin jong katei ka briew, hynrei ka la buh ruh ïa ki kyndon. Ka ïingbishar ka la ong ba kane ka briew kam dei satia ban phet rieh lane ban pynduh pyndam ïa ki sabut ne ki sakhi, ba ka dei ban ïatreilang bad ka ïingbishar kaba bishar ïa ka, ba kam dei ban mih na ka jylla Meghalaya khlem da ïoh jingbit shwa na ka ïingbishar kaba bishar, bad kan hap ban ai ïa ka ‘personal bond’ kaba shongdor T. 1 lak ryngkat bad uwei u nongbah-khlieh ha kaba ka dor kan long kumjuh.
Lada pynkheiñ ïa kine ki kyndon, na ka liang ka sorkar ka lah ban shim ïa ki sienjam ban phah pyndam noh ïa katei ka jamin ba la ai.
Lah ban kdew ba ki la don kiba leit sha High Court hapoh ka kyndon 439 Cr.P.C. na ka bynta ban kyrpad ban ai jamin ïa katei ka briew na ka daw ba ka don ïa u khñiang jingpang HIV. Katei ka briew ka dei kaba la shah kem hapoh ki kyndon ka aiñ NDPS Act, 1985
