Ha ka 30 tarik Nailur, 2023, ha ka jingïalang jong ki ar Myntri Rangbah ka Meghalaya bad Assam la rai ban pynduh noh ïa ka kynhun tohkit da ki nongbishar (Judicial Inquiry) halor ka jingjia shah siat ïap ha Mukroh kaba la jia ha u snem 2022, bad yn aiti noh ban tohkit da ka Central Bureau of Investigation (CBI). Halor ka jingaiti ban tohkit da ka CBI ïa ka jingjia ha Mukroh, u Myntri Rangbah ka Assam, u Himanta Bisaw Sarma, u la ong ba ka daw ba hap ban pynduh noh ïa ki Judicial Inquiry jong ka Assam bad Meghalaya ka dei namarba ki sakhi na kine ki ar tylli ki jylla kim shym la wan ban batai ha kaba ïadei bad ka jingjia, bad kane ka la pyndkoh ïa ka jingtohkit. Kumta yn tohkit noh da ka CBI bad yn nym pynrung ïa ka jingujor ha Shillong ne Guwahati, hynrei yn pynrung ïa ka jingujor ha ka jylla kaba long pdeng la ka dei ha Kolkata ne Delhi.
Mar ïa dep jia ka jingshah siat ïap ki san ngut ki nong Mukroh bad uwei u Forest Guard ka Assam ha ka 22 tarik Naiwieng, 2022, baroh artylli ki sorkar jylla ki la rai ban aiti sha ka CBI ban tohkit khnang ba kan ym don ka jingshah liang. U Myntri Rangbah ka Meghalaya, u Conrad K Sangma, u la leit hi dalade sha Delhi ban ïakynduh ïa u Myntri Korbar Ri, u Amit Shah, bad ban pynsngew ha u ïa ka jingkwah ban phah tohkit ha ka CBI ïa katei ka jingjia. Na ka liang ka sorkar Assam ruh ka la shim ïa kajuh ka rai ban phah tohkit ha ka CBI watla ka la mynjur ban thung da ka Judicial Inquiry. Ka sorkar Meghalaya ruh ka la thung lang da ka jingtohkit da u nongbishar ba la shongthait.
Hynrei hadien palat 10 bnai jong katei ka jingjia, kata ka jingphah tohkit CBI ka khlem poi shano-shano bad kita ki jingtohkit da ki nongbishar ruh ki khlem lah ban treikam ha ka rukom kaba dei. Mynta pat, ki arngut ki Myntri Rangbah ki la shim biang ïa kajuh ka rai ba la shim ha u Naiwieng 2022 ban aiti sha ka CBI ïa ka jingtohkit. Baroh shi katta ki ïa leh aïu haba ki la ïohi ba ka jingtohkit da ki nongbishar ka khlem poi shano-shano? Balei ki la ïa pynslem ban thoh sha ka Sorkar India ba kan aiti ha ka CBI ba kan tohkit halor ka jingjia ha Mukroh? La palat 10 bnai ngi la ïaid bad don ruh kiba la klet kaei kaba la jia ha Mukroh, bad mynta la khie khohreh biang sa shisien ban khot ïa ka CBI. Kine ki artylli ki sorkar jylla ki la shu pynlut kai ïa ka por bakordor. Lada dei ba la ïa tur tyngeh naduh u bnai Naiwieng 2022 ban phah tohkit CBI, katta kane ka kynhun tohkit ka la lah ban pyndep ïa ka kamram. Mynta ngi hap ban ïa ap biang sa katto katne bnai tat haduh ba ka Sorkar Pdeng kan mynjur ban aiti sha ka CBI ban tohkit halor katei ka jingjia.
Ha kawei pat ka liang, ka jingshim rai ha ka jingïalang ki ar Myntri Rangbah kaba la long ha Assam State Guest House, Koinadhara, Khanapara ha Guwahati ha ka 30 tarik Nailur, 2023, ban buh da ki pyrton jong ki Central Reserved Police Force (CRPF) ha ka thaiñ Lapangap kum shi bynta ban teh lakam ïa ka jingïakynad kaba mih man la ka por hapdeng ki Karbi bad ki Khasi Pnar ka long ka rai kaba dei. Kine ki CRPF ki dei ki pulit jong ka Sorkar Pdeng bad kim don hok ban shah liang shano-shano. Ka kamram jong ki kan dei beit tang ban pynthikna ba ki jaitbynriew Karbi bad Khasi Pnar kin ym ïakynad. Lada kine ki pulit CRPF ki pyndep hok ïa la ka kamram, ka jingsuk kan wanphai sha ka thaiñ Lapangap. Hynrei ngi sngewdei ban kyntu ïa ka sorkar jong u Conrad ba kan peitngor bha ïa ka jingtreikam jong kita ki pulit CRPF khnang ba kan ym mih kano-kano ka ban ktah kylla hadien habud. Na ka liang ki bor shnong Lapangap ruh kin hap ban long kiba peitngor ynda la wan ki CRPF khamtam ban ailad ïa ki nongshong shnong ban leit sha ki jaka rep khlem jingeh.
Ngi kyrmen ba da ka jingwan ki CRPF, ka jingsuk ruh kan wanphai ha Lapangap bad ha ki jaka ba marjan. Khyndiat bnai mynshwa, ngi la ïohi ïa ki jingïakynad ha Khanduli bad ha kine ki sngi pat ha Lapangap. Ki don jingthmu aïu ki Karbi ban pynthut ïa ka shongsuk shongsaiñ khamtam ba ka jingïakren pynbeit pud kam pat kut. Namarkata baroh ki hap ban long kiba jai-jai bad ban ap ïa ka rai jong ki Regional Committee bad jong ka sorkar Assam bad sorkar Meghalaya halor u pud u sam.
